UPA LALREMA PIANCHAM PHA PUALIN A – CHANCHIN TLEM

IMG_20180328_224152

HAPPY BIRTHDAY – UPA LALREMA

28th March

Vawiin March ni 28 hi Phullen pa lar Upa Lalrema pianchampha a ni a. Amah hi ka ngaisangin ka ngaihlu hle a, a chanchin ka hriat ang angte hi in lo chhiar ve atan ka rawn dah chhuak ve e.

 

Upa Lalrema hi March 28, 1928 Wednesday, Leap year kum khan Phullen ah a lo piang a. A pa chu Phullen Kohhran Upa hmasa ber zing a mi Upa Ralkaikima a ni a, a nu chu Pi Bawihchhungi a ni. Phullen kai kha 1926 a ni a, Phullen a piang hmasa pawl zing a mi a ni. An unau chu hengte hi an ni –

  1. Upa Lalrema H/o Thanzami (L)
  2. Saihnuna (L) H/o Lalbuangi
  3. Upa R. Laltluanga (L) H/o Lamkungi
  4. Ramthangi W/o Upa Ramzauva
  5. Ngurzami (L) W/o Upa K. Lalrova (L)
  6. Saithangliana (L) H/o Vanlalhumi Pachuau
  7. Ralkapsanga H/o Lalbiaknungi

Upa Lalrema hi lehkhathiam, hmanlai pawl 3 pass a ni. A naupan laiin Zirtirtu Hanga Sikul Phullen ah a kal thin a. Pawl 3 hi a kum khatnaah a hlawh chham a, a beihnawnnaah erawh a thiam hle a, tha takin kum 1939 khan a pass ta a. Khatihlai khan Phullen a zir theih chin chu Pawl 3 a ni a. Fa u a ni bawk nen Pawl 4 a zir chhun zawm thei ta lo a. Mahse, thiamna thuk zawk leh zau zawk nei turin kum 1940 khan Kelzam khua a zirtirtu thiam tak Pu Biakthuama hnenah a nu leh pa ten an kal tir a. Pu Biakthuama hnenah hian English leh Mathematics a zir deuh ber a.  Sorkar lehkha Petition, saptawng un tak takte hi chipchiar takin letchhuak diak diak thei vek lo mahse, a tlangpui chu a hre vek thin a ni.

Upa Lalrema hi Kristian chhungkua, ringtu hmasa leh kohhran hruaitu pawimawh atanga piang leh seilian niin, a pa Ralkaikima kha Khandaih Vanphunga khaw kal zel, tun hnua Phullen Kohhran ni ta a Kohhran Upa hmasa ber a ni. Hetiang a nih vang hian Pathian leh a kohhran ngaipawimawh mi, Kohhran tana theih tawka thawk thin a ni. Kum 1946 February ni 22 (Zirtawpni) khan Pi Thanzami nen inneiin Pathian malsawmna fa mi pa 4 leh hmeichhia 3 an nei a, kohhran leh khawtlangah pawh mi puitling tak tak an ni hlawm.

A pa hnung zuiin, Mizoram buai vanglai, kum 1968 khan Upa Lalrema hi Phullen Kohhran Upa ni turin thlan a ni a. Kum 1968 ah vek hian Suangpuilawn Kohhran Biak Inah Hmarphei Presbytery in Kohhran Upa atan a nemnghet nghal a ni. Tualchhung Kohhran ah nihna pawimawh hrang hrang a chelh bakah, Pastor Bial Chairman te, Bial Secretary hna te leh Presbytery Moderator hial te a lo chelh tawh a, Mizoram Synod ah, committee pawimawh tak- Music committee te, Pastoral Committee ah te member a lo ni tawh thin bawk a ni.

 

Upa Lalrema sawi hi chuan, amah mai hi duh tawk a har a, a pa Upa Ralkaikima, Vanphunga khua Khandaih Kohhran kal zel, a hnua Phullen Kohhran lo ni ta a Kohhran Upa hmasa ber chanchin hi sawi tel a chakawm thin.

Kan hriat angin, Upa Lalrema pa Upa Ralkaikima kha ringtu hmasa, kohhran hruaitu, Upa a ni a. A pa chu Rokanga a ni a, a nu chu Zaphung huaisena farnu Saihnuaii a ni. Upa Lalrema nu te hi kan lal Pu Awksarala te nen inhnai tak an ni a, Pu Awksarala khan puanthui te a thiam tir a ni.

Kum 1906 vela Pathian thu awih (Kristian) te tihduhdahna chuan zual lam a pan hle a. He tihduhdahna ah hian khawnbawl upa, fing leh thunei em em Darkhuma fapa Saithuama chu a phusa ber zingah a tang a. Saithuama hi lal upa fa a nih baka, a pa lianin a chak hle a, mi ten an zahin an hlau hle a. Tihduhdahna kawngah phei chuan lal ai pawhin an hlau zawk hial a. Hetihlai tihduhdahna vang hian Tv Chalbuanga pawh pawh Martar hmasa ber niin a thih phah hial nghe nghe a. Heta Darkhuma hi tuna PHC tlang ni ta hming hmasa “Darkhuma veng tlang” hming put chhan a ni.  

Ni khat chu, Ralkaikima (Upa nit a) nu Pi Saihnuaii (Upa Lalrema pi) chu chhuat laiah thu thluangin a fapa tleirawh uaih tawh Ralkaikima (Upa) chu a mal a lukham tir a, a lu keivin a hrik a en sak a. Chutih lai tak chuan khawnbawl upa fapa Saithuama, Kristian ten an hlauh em em mai chu an inah chuan a dak lut hlawl mai a. Kristianhote an tiduhdah nasa si a, Kristian an nih avangin Saithuama chuan a rawn nghaisa dawn a nih an ring nghal mai a. Saithuama chuan, “Saitual ah kuli a kal tur a ni a, chuta kal tur chu i ni e. A kal ni tur chu Pathianni a ni ang. Pathianni a kal i duh loh chuan, Inrinni ah nangmahin lo zuk inchhawp rawh”  tiin tleirawl Kaikima chu a rawn hrilh ta mai a.  

Kuli kal ni atan Pathian ni an thlang kher kher hi Kristian a nih vanga tihduhdahna chikhat a ni a. Pathian thu awih Ralkaikima chuan Pathianni chu serh a, inkhawm a duh ngei dawn tih hriain chumi tibuai tur chuan Pathianni a kal turin an ti a ni a. Tleirawl ve uaih tawh mah ni se, mahni a Kuli a kal hmasak chu a huphurh hle a, mahse  Pathianni serh loh a duh si lo, tichuan ram hnuai sa hlauhawm karah hlau chung chungiin amah chuan a kal ta a.

Tunlai angin kawng mumal a la awm si lo. Khandaih atanga Saitual kal chu a namai lo hle a. Thanglailung kaltlangin, Arthladawn mualah kawng sah pawp mumal lo tak, kal harsa tak zawhin Chhirdem ah, chuta tangkin Darkhuang mual an liam a, Tuivawl an kan a. Tuivawl atangin ram vah kawngah Sihfa a pan leh a. Sakei hnu, lian deuh leh te deuhte, hnu hlui deuh leh hnu thar deuh te a bak chuk mai a. Tleirawl mai a la ni bawk si a, a hlau em em mai a. Hlau chung chungin Saitual ah chuan a in dah fel thei ta a. Vanneih asiamin engmah tibuaitu a tawk lo hlauh bawk a. Tluang takin a haw ve leh thei ta hlauh a. Chutiang chuan Pathianni serh duh vangin hrehawm nasa tak a lo tuar tawh a ni.  

Nakinah chuan, Kristiante tiduhdahtu Saithuama bawk chuan ring leh fiah takin “Ralkaikim” tiin a hmin pumin, pawn atang chuan a ko lung lung a.  Pathianni a serh loh phah nan Kuli turin an tir a, mahse, an rin loh deuhin a hma niin a lo dah fel der mai si a. An Kristian ruh hle tih a lang reng si a, chuvangin a rawn nghaisa tawh ngei dawn a nih ringin a lo hlauthawng hle mai a.  Saithuama chuan, Pathian thu I la awih ta reng em?” a rawn ti a. A zawttu chu a pa lianin a chak si, engtin nge a tih ang aw?  Pathian thu a Awih zel thu a hrilh chuan, nasa takin a nghaisa ang tih chu a rinlawk theih a. “Awih reng lo e” a tih chuan Isua a phatsan a ni dawn si. A ngawi vang vang a, a hnu deuhah chuan “Awih e”  tiin a chhang ta a.  Chutah le! Rin loh takin Saithuama chuan, “Lo awih reng rawh u, kei pawh ka la rawn awih duh ve mai thei a ni” a ti a, a kal ta daih mai a! A thinrim hle dawn emaw tih laia, rin loh tak mai a chhan avang chuan Kaikima chu a lawm em em a, a thawveng huai a. Hlau chung chunga Pathian a phatsan lo chu a hlim phah hle a ni.

Pathianthu awihte tihduhdahna hi Kawnpui, Changzawl an insawn hnuah pawh a hluar zual hle a. Mahse Kristiante pawh rinnaah an nghet sauh emaw tih tur a ni a. Kawnpuiah hian kum 1907 khan a hrangin Biak In an sa ta nghe nghe a. Upa Ralkaikima chu Kohhranah inhmang zelin a hruaitu pawimawh zingah a tel a. Changzawl awm lai kum 1907 a  lal Vanphunga leh Zosapte an inhmuh thiam loh khan, lal Vanphunga khan, a fapa Lalbuaia Sailo (Luangpawn lal ni ta) leh Pu Ralkaikima (Upa Lalrema pa) leh Pu Vawma (Khawnbawl upa, Ztr Hranga pa) te chu Aizawl ah Bawrhsap dawr turin a tir zui a. Vanphungan Pathianthu awihte tihduhdah a bansan loh chuan, a lalna ban tir a nih tur thu Bawrhsapin a lo sawi thin chu, mi ten Vanphunga lamkalte hi an hrilh ngam lo a. Mahse Upa Ralkaikima teho hi chuan zep lovin an hrilh ta vek a, Kristiante tihduhdahna pawh a ziaawm phah ta a ni awm e.

Kum 1910 ah Thanglailungah an insawn leh a, lal Awksarala chu lal a ni zui a. Thanglailung awm atang hian Kristiante tihduhdahna a lo reh ta a. Krismas te pawh ruai nen an hmang tan a. Kohhran pawh lo changtlung sawt hle a. Kum 1913 ah Kohhran Upa thlan a ni ta a. Aizawl atangin ringtu hmasa Pu Thanga ten an inthlanpui a. Ralkaikima, Kuaia, Zokung leh Tuaha te an thlang a. Ralkaikima, Kuaiate, Tuahate hi, hemi kum vek hian Aizawl Presbytery chuan Kohhran Upa atan a nemnghet zui nghal a. Tichuan Khandaih Kohhran kal zel, tuna Phullen Kohhran nita a Upa hmasa ber an lo ni ta a ni.

    Upa Lalrema chanchinah let leh tai la. Upa Lalrema hi pa kawm nuam tak, ti ti thiam tak, fiamthu duh bawk si a ni a, a kianga awm chuan nuih inpeih reng a ngai thin a. Fiamthu duh leh hlim thei tak a nihna hi kum 89 a nih tawh pawh khan a la nunpui reng a. Tawngkam bungrua tha tak tak a nei a, Kohhran ah hnatlang tura Kohhran mipuite fuih phur pawh a thiam hle thin. A fiamthu leh a titite hi lakkhawm a, dah that tham a neiin ka hre thin. Kar kalta maia chatuanram min pansan ta Pi Vanlalawii pawh khan, kum 97 a nih tawh khan, Upa Rema titi sawi chhawngin a la nui bawk bawk nia.

Upa Lalrema mizia tilang chiang em em tu, a chanchin ka hriat pakhat chu, hman kum tawh khan Diakkawna dawrkai pakhat chuan, “Upa Rema hi dawrah lo dak lutin, ‘hei, kan tuteho hi, naupang an la ni a, in dawrah hmawmsawm leina ba te an lo nei mial lo maw?’ tiin a kal pahin Ba an neih leh neih loh a rawn zawt leh zauh thin” a ti. Pastor induction service a Pastor a fuihna tawngkam ka la hriat reng pakhat “Kohhran zamna ngul rinawm tak nih tum ang che” a tih hi amah hian a takin a nunpui a ni.  

Pa kawm nuam leh titi thiam, fiamthu duh tak, mite tihhlim thiam tak, Phullen Kohhran Upa hmasa ber fapa Upa Lalrema hi, vawiin 28.3.2018 a a pianchampha lo thlenga, kum 90 lai a lo ni ta hi, thinlung takin ka lawmpui a. A hriselna te lo tha zel se, Pathian zarah kum 100 chuang dam ngei turin PIAN CHAMPHA PUAL DUHSAKNA CHIBAI KA BUK E.

Hengte hi ka hriat dana ziak ka ni a, a dik tawk lo palh mai thei, a dik lo lai a awm chuan, a dik zawk kan inhrilh dawn nia – Buata Bawihtlung

 

******************************

Advertisements

Van Indona – Phullen Pastor Bial Zaipawl

Ni 5.12.2017 Thawhleh zan khan SYNOD 94-na Bungkawn Kohhran Biak In ah, Inlana leh Reports zanah Phullen Pastor Bial Zaipawl te chu an zai.

Hemi zan hian SYNOD Choir leh Kanhmun Pastor Bial Zaipawl leh Phullen Pastor Bial Zaipawl te an zai a.  Phullen Pastor Bial Zaipawl te hian VAN INLARNA tih hla an sa a. He an hla sak hi Biak In extension atangin Mobile phone a record in Inkhawm ban hnu a Zaipawlte leh a tawimawmtute thlalak nen Mobile hmangi  Video a siam a ni.

Hei hi Official Music videos a ni lo a. Mobile a lo remkhawm ve mai chauh a ni a. An zai leh thlalakte pawh, a nihna ang anga Mobile a record anga dah a ni.

 

Pathian leh A Kohhran tana khuangpu rinawm Pu Neihtawna kan chan ta.

Pu Neihtawna RIP - JPG with Stroke

Pu Neihtawna

Vawiin 16.8.2017 Nilaini chawhnu dar 2:20 PM a Pu Neihtawnan chatuan ram min pansan tak thu hriat hian rilru a luah hneh hle mai. Veng khata awm tih takah kan naupan lai atang tawha ka hriat ve a ni a. An Kawlhai kung leh Leihkapui dawh san te kha mitthlaah a lo lang thar leh.

Pu Neihtawna hi kum 1923 ah Changzawl hmun a awm laia piang a ni a, hman ni lawka Chatuan ram min pansan ta Upa Thanzuala nen khan kum khat chhuak ve ve an ni a, tunah kum 94 mi a ni ve tawh a ni. A nupui chu Pi Kawlluti a ni a, Pathian malsawmna dawngin tu leh fa thahnem tak a nei tawh a ni.

Changzawl a piang a nih dan hi han sawi fiah leh lawk ila. Kum 1905 a Khandaih khua a Hripui lo thleng kalzel avang khan Changzawl a kai an rel a, 1906 Pawltlakah an Kawnpuiah bawk an khawh a, 1907 ah Changzawlah an kai a, kum 1910 ah Changzawl atangin Thanglailungah an kai leh a, kum 1914 ah Thirhlumah an kai leh a, mahse kai ve lo thenkhat an awm a, chungte chu Phullen ah an awm a. Kum 1920 khan Thirhlum leh Phullen hmuna awmte chu Changzawl ah infinkhawmin an kai leh a. Changzawl ah hian kum 5 vel awrh chauh an awm chhung hian Pu NEIHTAWNA hi a piang a ni.

Hun rem changah lain, Pu Neihtawna pa Pu NEIHRUMA chanchin hi han sawi thui hlek ila. Pu Neihruma hi Khandaih awm laia Lehkha thiam hmasa, pawl 3 pass ngat a ni a. Khandaih lal Vanphunga hnuaiah Khawchhiar a ni. Khawchhiar hi Sap ho khan Village Writer te pawh an ti a ni awm e. Tun laia VC Secretary ang deuh hi an ni a. Mahse khatih lai khan ziak leh chhiar thiam an la awm mang lo a, tun laia VC Secretary ai chuan an hniam lo turah ka ngai (BB). An hna ber chu khawtlang thil pawimawh a Aizawl kal leh Lal khawi lo kal hnung zui a, tawiawm kha a ni ber a, Lal leh khawtlang tan an pawimawh hle.

Pu Neihtawna pa Pu Neihruma hi Kistian hmasa zing a mi a ni a. Mizoram a Thlarau Thianghlim Harhna hmasa ber kum 1906 April ni 8 a Tuivai Sangha tlangvuakna a a thlen khan, Pu Neihtawna pa Neihruma pawh kha a tel ve a, Hla chang sawitu a ni. Kha Harhna ah khan an zai tui em em a, Tuivai atanga khua (Khandaih) an thlen thlengin an zai a, kawng laka an chawlh lai pawhin an zai zel a. Hla pakhat pawh vawi 30 te an la nawn a, an zai tawp hlei thei lo a ni.

Pu Neihtawna te hi Kristian chhungkua atanga piang leh seilian an ni bawk a, Pathian leh a Kohhran tan an rinawm em em a. A unaupa Pu Neihkhuma pawh kha Phullen khua atanga Missionary chhuak hmasa ber a ni a, kum 1953 September ni 28 khan Missionary in a chhuak a ni.

Pathian leh a Kohhran tan an inhawng em em a. Khandaih venga an awm laia veng hrang hranga Krismas hman a nih țhin lai khan, an In kha Krismas hman nan a thawh thin a. An In ah Kohhran mipuite lengkhawmin zan engemaw zatte an tlaivar țhin a. Krismas dawngtu nih kha a namai lo hle na a, tlin takin an dawng thei zel a ni.

Pu Neihtawna hi kan hriat phak ve chin atangin Kohhran khuangpu, Khuang vuak thiam leh taima a ni. Kohhran inkhawm a ngaipawimawh em em a. Zing tawngtai inkhawm te hi a hmaih ngai lo va, midang an kal ve loh pawhin amah chauh pawhin zing tawngtai inkhawm hi a kal lauh lauh peih thin. Hemi avang hian Zing tawngtai inkhawm tantu hming Kohhran Secretary in an chhiar chhuahnaah – Thawh tanah Pu Neihtawna, Thawhlehah Pu Neihtawna, Nilaiah Pu Neihtawna, Nilaithawhtanah Pu Neihtawna ti a Chawlhkar khat dawn lai a hming a zawna awm a chhiar dan chu fiamthuin an sawi thin.

Hman deuh khan Awmvel natna a nei a, kawr a ha thei lo va, chute chung pawh chuan inkhawm a thlah ngai chuang lo. Kum 90 val a nih hnuah pawh Kohhran inkhawmah khuang a la vaw thei zel a. Kohhran tan a hlu tak zet a. Hetia chatuan ram an pan ta mai tur hi, Kohhran tan a uihawmin a khawharthlak dawn hle mai a. Van khawpui lam erawh Khuangpu rinawm leh tha an neih belh avanga lawmin an lo hlim viauin ka ring.

IMG-20170816-WA0053

IMG-20170816-WA0056

Buata Bawihtlung
Dt 16.08.2017, 9:30 PM @ TKT

Phullen Pastor Bial Pastor Quarters thar hawn a ni ta

Vawiin September 3, 2017 (Sunday) chawhnu Inkhawm ban hnu,  Dar 3:30pm khan, Phullen Pastor Bial Pastor Quarters, Phullen Farkawn veng a sak chu Pathian hnenah hlanna hun hman a ni.

IMG-20170902-WA0015

He hun hi Bialtu Pastor Rev Lalngaihawma Bial Chairman chuan a kaihruai a. Upa T.Lalchhuanvawra Bial Secretary Sr chuan Pastor Quarters sak a nih dan Report a pe a.

Rev. PC. Pachhunga Synod Executive Secretary chian Pathian hnenah hlanin, hlanna thu a sawi nghal a. Bial chhung kohhran mipuite hnenah, Pastor Quarter tha thak an sak theih avangin lawmthu a sawi bawk a ni.

PATHIAN LEH A KOHHRAN TANA MI TANGKAI UPA THANZUALA PHULLEN KAN CHAN TA

– Buata Bawihtlung 29.06.2017, 11:30 PM @ TKTAZL

 

IMG-20170629-WA0023

Vawiin chu, zinkawng ka zawh mek laiin kan Kohhran Upa senior, Phullen Kohhran banpui pawimawh em em, Phullen pa ropui leh mi hmasa Upa Thanzuala kan chan thu ka lo hria a. Ka ui ve ngawih ngawih a ni. Upa Thanzuala chanchin hi hriat belh ka chak thin hle a, ama ti ti ngei ngaihthlak ka chak thu ka sawi fo thin a, hun remchangah kawm ngei ka duh thu a tupa Er C-a hnenah ka sawi leh ringawt thin, mahse khua ka tlai zo ta si. A chanchin tam tak zingah, tlem tal hi ka rawn pho chhuak ang e.

Upa Thanzuala kha Pu Liandailova leh Pi Chawngveli te fapa a ni a. Kum 1923 May ni 15 khan Hliappui ah a pianga. An unau hi paruk niin mipa pathum leh hmeichhia pathum an ni. Tlangval fel leh sa tha lam a ni a. Kum 1946 khan Phullen nula hmeltha Pi Rualdailovi (L) nen an innei a. Hetih lai hian India Sipai a ni tawh a ni. A nupui Pi Rualdailovi nen khan kum 1946 October ni 6 ah an innei a, fa pariat (8) neiin, Mipa 4 leh hmeichhia 4 an ni. Tu leh fa pawh thahnem tak a nei a ni. A nupui Pi Ruali khan kum 87 mi niin Ni 20.02.2014, zing dar 7:05 AM khan a pasal hi a lo kalsan tawh a.

Upa Thanzuala fate chu:
1. Ramthianghlima H/o Zosangzeli – Phullen
2. Laltlansai W/o C. Lalsanggluaia – Aizawl, Ramthar veng
3. Upa Lalthangzauva H/o Lalbiakchhuangi – Phullen
4. Lalnunchhuangi W/o K. Lalhmachhuana – Phullen
5. Lalremsangi W/o Lalthanzuala – Winchester, Assam.
6. Vannunziri(L) W/o C. Thangchhuna – Chaltlang, Aizawl.
7. Lallawmawma H/o Lalnunmawii – Phullen.
8. Lalhmingzova H/o Vanlalkhawhluni – Capital Complex, Aizawl

Upa Tanzuala kha pa lian tak ni lo mahse, a pian a nghet thain, a thatlai phri chuan a chak tha hle a. A pumraw tet a en chi a ni lo an ti thin. A rualpuite zingah inbuan chak a sawi a ni a. Sipai a tan lai pawhin, a chakzia leh a duai loh zia a hriat zel a. Sipai infiamnaah an Batalian aiawhin Lungdenah a chhuak pha hial thin a ni. Hei hian a pumrua a en chi a ni lo tih a tilang awm e.

Upa Thanzuala kha lehkha zir sang lo mahse, lehkhathiam a ni a, a rualpui zingah a thiam ber zingah a tel thin a. Lower Primary pawh kum 1936 khan First Division ah pass ngat a ni. Khawvel Indopui pahnihna lo chhuakah India (British) pawh a tel ve avangin Lehkha hi a zir chhun zawm thei lo a. Mahse a finna leh a thluak thatna hi a hnu thlengin a lang a. Sipai an tanlai pawhin tawng a thiam chak hle a, Vai tawng leh Sap tawng thiam a sawi a ni. A mimal eizawnna piah lamah, Kohhran leh khawtlang pawhin nasa takin a finna hi a chhawr a ni.

Tlangval hrisel leh chak tha a ni a, kum 1942-ah khan kum 20 mi niin India Sipai ah a lut a. Amah a fel bawk a, lo te Sipaia a tan hnuah Naik a kai nghal mai nghe nghe a ni. A sipai tan lai hian Silai leh ralthuam nena ral kap tu lamah awm lovin, Sipai inbiakpawhna lam hna “Signal” lamah a awm thin. A hna avangin hmun hrang hrangah a kal kual a, Japan ral nena inkahna rapthlak thlenna Kohima ah te, Burma lam ahte a tel ve a ni. Burma an awm lai hian kulh hming thang tak, Siampahranga Kulhte luhchhuak tute zingah a tel a. He kulh beihnaah hian Wireless Operator ah a tanga. Hemi tum hian pawisa dahna In an veng a, an hotuten insaseng turin leh, pawisa pawh an duh zah zah la turin an tia, mahse an la lo a. Paihte pakhatin Rs 100 a la a, thui tak, chawhma kal vel a hla an insaseng hnuah Paihte pa chu an dil ve leh hnuhnawh a ni awm e.

Kum nga awrh Sipaia a tan hnuin, India in British laka Independence a hmuh kum tak, kum 1947 khan Sipai atang hian a chawl ta a. Sipai a tan chhung hian a che tha hle a ni tih a hriatna chu, kum 5 lek sipai a tan chung khan, Naik a kai thuai a. Naik mai bakah Arsi 2 leh Tangkapui 1 pawh Poona ah hlan a ni nghe nghe. An hunlai ngaihtuahin, hetiang chawimawina a dawng thei hi, a namai lo hle a, a chhuanawm tak zet a ni.

Mizoram buai hma kum 1960 khan kan khua – Phullen Dak In ah hian Postmaster hna a thawk tan a. Mizoram a lo buai tak avangin kum 1966 khan a hna atangin a chawl a. Sipai bang a ni a, Signal lam thiam a nih avangin MNF lam ten Sipai zawm ve turin an sawm a. Ram hmangaihtu thinlungpu ve ta chu, MNF volunteer chu a zawm ve ta a. MNF ah hian rei awm lovin a hna ngai Post Master hna chu a thawk chhunzawm leh a ni.

Kohhran leh khawtlang tan mi tangkai tak, sulhnu ngah tak a ni a. Mizoram buai hma kum 1960-1963 VC Term ah khan Pu Tawnkima (Upa) VCP na hnuaiah khan Phullen VC Member a lo ni ve tawh a. Kha tih laia a VC te chu Pu Tawnkima (Upa) VCP, Pu Biakchhunga VP, Pu Kapthianga Secy, Pu Members – Thanzuala (Upa), Pu Lalenga, Pu Rokima te an ni. Tin, kan khua a Consumer Society tha tak leh changtlung tak din a nihna kawngah khan a sulsutu zinga mi leh a bul tantu zingah khan a tel ve a ni.

Upa Thanzuala hi Pathian tih mi, Pathian leh a Kohhran tana mi tangkai tak a ni a. Kum 1937 khan Pathian leh a Kohhran hmaah Baptisma a chang a. Sipai atanga a chawlh hnu hian a theih ang tawkin Pathian leh a Kohhran tan rawng a bawl a. Chanvo pawimawh tak tak pek nghal a ni a. Sipai atanga a chawlh kum 1947 hian Sundae Sikul ah Zirtirtu ah lak nghal a ni a. Kohhran tan a tangkai em em a. Kum 1950 khan Phullen Kohhranah Tual Upa a ni a, kum 1968 thleng Tual Upa a ni a. Upa Thanzuala hi kan Presbytery huam chhungah SYNOD Preacher kan neih chhun a ni a, kum 1952 khan SYNOD Preacher hi a lo pass diam tawh a ni.

Kum 1944 August ni 27 atang khan Phullen Kohhran ah Thalai pual inkhawm Pathianni zan mipui inkhawm hmain ruahman a ni tan a. Tuna KTP kan tih tak hi kum 1954 kum tawp lam khan Phullen ah din ve a ni ta a. Upa Thanzuala hi KTP Phullen Branch din a nih khan KTP Leader hmasa ber a ni nghe nghe a ni. Kum 1973 February ni 13 khan Kohhran Upa atan thlantlin a ni a, hemi kum vek October ni 14 khan Hmarphei Presbytery chuan Phullen Kohhran Biak Inah Kohhran Upa atan a nemnghet a ni.

Upa Thanzuala hian Kohhran ah chanvo pawimawh tak tak a lo chelh tawh a, sawi vek sen a ni lo. Tualchhung Kohhran Committee Chairman, Secretary te, Puitling leh Naupang lam Sandae Sikul Superintendent te a chelh tawh a. Presbytery ah Treasurer ni tawhin Synod ah Executive Committee a ni tawh bawk a, Ramthar Board leh Tihdam Rawngbawlna Board ah te Synod a STRB ah te Executive Committee a lo nih tawh bakah, Presbytery sum ziaktu leh Auditor hna te, te a lo chelh tawh a ni. Amah hi B.S.I ah Life Member a ni a. Sandei Sikul zirtirtu kum 25 leh kum 50 tling chawimawina Certificate bakah, Diploma leh Jubilee hial a dawng bawk a ni. Heng a thil dawn hi mi bik tan lo chuan dawn theih loh ti ila a dik hial awm e.

Hun rei tak Pathian leh a Kohhran tana rawng a bawl hnuin, a kum a lo tam ve tial tial a. A taksa chakna pawh a tla hniam ve hret hret a. Tlem lai khan a pum a na vak a, a pum chu a puar bawk a, chhungkhat lainate bakah khawtlang mipui kan chi-ai hman lek lek a. Pathian zarah damna a chang zui hlauh a. Chutia tha taka a awm mek lai chuan vawiin ni 29.06.2017 Thursday chawhnu dar 2:00 PM khan a chenna In Phullen natlawk nei lem lovin min boral san ta a ni.

Hetiang taka pa ropui, Kohhran leh khawtlang tana mi tangkai Phullen khawtlangin kan chan ta mai hi a hrilhhai thlak tak zet a. A kalsan tak a chhungkhat laina, a tu leh fate mai bakah, a rawngbawl sak Kohhran mipuite leh Phullen khawtlang tan channa nasa tak a ni a. A hmunruak luah zo tur an awm dawn si lo a, kan ui tak zet zet a ni.

*Biangbiakte leh Thulaknate*
👉🏼Phullen Kohhran Souvenir
👉🏼Tv PC Ramdinthara (Upa Thanzuala tupa)
👉🏼Pu V.Vanthuampuia

# *_Mobile Phone ah ka type zet a, a sei lutuk a vangin Computer ah ka ti leh a, ka enfiah uluk hman ta lo. Dik tawk lo leh hriatsual palh a awm chuan, a dik zawk kan in hrilh hre dawn nia. – Buata Bawihtlung_*

*******************************************

Phullen Kohhran Biak In Thlahna Inkhawm

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang vuain hla an hruai a. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

 

PHULLEN PRESBYTERIAN KOHHRAN BIAK IN THIAH A NI TA

Phullen Presbyterian Kohhran chuan  hun rei tak an lo hman tawh Biak In pui chu Ni 30th May 2017 Thawhlehni khan ṭhiah  ṭan a ni ta a. Kha leh chen hlim tak leh nuam ti taka Pathian biak nana lo hman tawh hetia han thiah tak mai chu, hmasawnna tur leh Biak In thar neihna tur mah nise, a lunglen thlakin, hnuk a ulh ve lek lek thei nia.

Phullen Kohhran Biak In thiah5

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang an vua a, Keyboard Tv. H.Lallawmkiman a tum a, Pu Malsawmdawngzela (Lalmama) chuan Aurinna (Mike) a chang a, anni ho chuan zai an hruai a ni. Ban hla bikah hian Pu David Lalrinawma chuan Aurinna (Mike) a chang ve thung a ni. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

Phullen Kohhran Biak In thiah

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

Ni 30th May, 2017 Thawhlehni hian Kohhran pum huapin Biak In ṭhiah chu ṭan a ni a. A tirah Kawngkhar leh Tukverh frame te lak thlak hmasak a ni a. Chumi hnuah a chung rangva thiah chhun zawm leh phawt a ni a, tichuan a dang pawh ṭhiah zui zel a ni. Hemi ni hian a chung leh a bangte leh ceiling te thiah vek hman a ni. He Kohhran hnatlang ah hian Phullen khawchhunga Kohhran dang atangtein hnatlang a thawkchhuak mi engemaw zat an awm a, Phullen Kohhran mipuite an lawm tak zet zet a ni. He hnatlang chawchhun hmeh tur hi Kohhran Pavalai pawl ten an tum a, Vawksa tui tak an hmeh a. Hemi ni hian Kohhran mipui mi 200 vel zet an hnatlang a, kan Kohhran Upa min Upa Lalrema pawh chak vak tawh lo hle chungin a thawkchhuak thei a, Kohhran choka lamah a lo hnatlang ve a ni.

Ni 1st June, 2017 Ningani hian JPC General Body meeting Kohhran Hall ah neih a nih avangin Biak In thiah hnatlang hi chawlh lailawk a ni a. A bakah chuan ni 31st May 2017 Nilaini atangin Kohhran hnatlang neih chhun zawm zel a ni a. Ni 5th June, 2017 Thawhtanni hian hnathawh tur bik in ruat inruatin hnatlang neih leh a ni bawk.

He kan Biak In thiah hnatlangah hian Kohhran mite inpekna a fakawm hle a. Kohhran mipuite bakah, Kohhran dang atanga kan Biak In thiah hnatlanga rawn thawkchhuak, mitlawmngai thahnem tak an awm a. Hetianga thanemngai taka hnatlanga chhuak an awm leh Kohhran dangte atanga hnatlang chhuak an awm thin hi a lawmawmin, a ropui tak zet zet a  ni.

Vawi tam tak kan lo lawiluh ve na thin, kan Kohhran Biak In, thiah a nih takah chuan, hmanlai an chang ve ta mai dawn a ni a. Nimin lawka ding luah thin kha, tunah chuan a tak hmuh tur a awm ta lova, thlalak leh suangtuahna mitthlaah lo chuan hmun a chang ta lo. Ava lunglenthlak tehlul em!

Nakin lawkah chuan, thangthar ten suangtuahnain an thlir kir ang a, thawnthu angin a chanchin an la sawi ang a. Chutih hunah chuan keini hi kan la dam a nih pawhin, mittui hnam sawk sawk chungin kan la mitthla let thin ang a. Kan mitthla chuan he kan Biak In thiah tak hunlaiah min hruai kir thin tawh dawn a ni.

He kan Biak In hi, hmun hran hranah awm bosan lawp lawp thin mah ila, ka tan chuan hei aia Biak In nuam leh hlu hi a awm thei bik lova, hei aia ropui pawh hi a awm bik hek lo. Mihring hmasawnnain hmalam a pan zel a, sak that a lo ngai ta tlat si a. Hetia thiah a lo tul ta hi, a lunglenthlak zawnga thlir chuan, mittui a lo hnai nghal vat thin. Ka va han ui tak em!!

Mahse, kha kan Biak In ngei mai, kan ui em em leh kan ngaih em em kha, a nawmna leh a hlutna te, a ropuinate kha, amahah khan a awm lova. A chhunga awm Pathian Thlarauthianghlim leh Kohhran mipuite ah zawk a awm a ni tih ka ngaihtuah thlen chang erawh chuan, ka thaw huai thin.

Kohhran mipuite kan trang tlang ang a, Pathian awmpuinain lungrual takin Biak In thar kan sa zo thuai ang a. Chu Biak In tharah chuan Pathian Thlarau Thianghlim awmpuinain Pathian kan fakho leh dial dial ang a, lungrual takin, hlim takin kan lawiza leh ang a. Tichuan Biak In nuam tak, Kohhran ropui tak chu kan chhawm nung zel ang a. Pathian châka tuihal apiangte thlamuang taka an lawiluh theihna Biak In, Pathian kan hmuh leh pawlna hmun, Biak In nuam tak kan nei leh ngei ang tih ka ring e.

 

Lalbuatsaiha
Dt. 06th June, 2017