PHULLEN KOHHRAN PAVALAI PAWL

Phullen Kohhran Pavalai Pawl hi Dt 15.10.2009 a din a ni a. A din tirh a hruaitu Office Bearers (O.B) hmasa ber te chu:

Chairman : Pu R. Lalthantluanga

Vice Chairman : Pu B. Lalṭhazela

Secretary : Pu H. Hmingthangbika

Asst Secy : Pu Lallawmawma

Treasurer : Pu T. Lallawmkima

Fin. Secretary : Pu. Malsawmdawngkima

 

Phullen Kohhran Pavalai Pawl hi, din a nih tirh aṭangin Kohhran tan a ṭangkai tak, Kohhran kutke pawimawh tak an ni a, chu chu tun thlengin an la vawng nung reng a. Kohhranin Biak In kan sak lai leh engemaw, tha thawh ngai thil a awm lai phei chuan, an pawimawhna a zual tak hle ṭhin.

 

Kumin 2018 a Phullen Kohhran Pavalai Pawl hruaitu Office Bearers (O.B) te chu hengte hi an ni:

Chairman          : Pu R.Lalbiaknunga

Vice Chairman  : Pu Malsawmdawngkima

Secretary          : Pu B.Lalhmingsanga

Asst Secy          : Pu PL Remruata

Treasurer           : Pu B. Lallianzuala

Fin. Secretary    : Pu C.Vanlalsawma

Advertisements

Phullen Kohhran Biak In sak mek, July & 10th August, 2018 chhung thlalak ṭhenkhay

PHULLEN KOHHRAN LEH BIALTU PASTOR LO NI TAWHTE

Phullen Kohhran hi Pastor bial hrang hrang pasarih ah lo awm tawhin, Pastor fel leh ṭha tak tak engemaw zatin an lo awp tawh a. Kum 1986 atangin Bial hming putu niin Phullen Pastor Bial chu a hrangin a lo awm ve ta a, Rev. Chanchinmawia chu Bialtu Pastor hmasaber a ni. Khaw hmun sawn avangin Pastor Quarters sak tur chu khaw thar lamah sak mai ni se tia rel a nih angin, Phullen Vengthar Biak In bulah kum 1990/91 khan Pastor Quarter chu sak a ni ta a. Phullen Kohhran pawh chu vengthar lamah sawn a ni ve leh ta a. Kum 2016 ah Phullen Vengthar Pastor Bial a lo pian takah chuan Pastor Quarters pawh Phullen Kohhran Biak In bualah sak a ni ve leh ta a ni.

PASTOR BIAL A LO BEH TAWHNA LEH BIALTU PASTOR TE:

Sl.no.  Hming     Awmchhung   Bialhming

  1. Rev. Thangkhuma 1914-1923    Thangkhuma Bial (Lamzawl atangin)
  2. Rev. Liangkhaia 1923-1932    Liangkhaia Bial (Saitual atangin)
  3. Rev. Khama     1933-1938    Pawlrang Bial
  4. Rev. PD Sena     1938-1945    Kawlkulh Bial
  5. Rev. Dawnkima 1945-1969    Vanbawng Bial
  6. Rev. Zasanga     Jan-Nov, 1970    Suangpuilawn Bial
  7. Rev. C Lalrampara 1971-1978    Suangpuilawn Bial
  8. Rev. Tailinga     1979-1980    Suangpuilawn Bial
  9. Rev. CM Zalenthanga 1980-1983    Suangpuilawn Bial
  10. Rev. R. Lalnuntluanga 1984-1986 Suangpuilawn Bial
  11. Rev. Chanchinmawia 1987-1991    Phullen Bial
  12. Rev. A.K Dawia 1992-1988    Phullen Bial
  13. Rev. R. Laldinthara 1999-         Phullen Bial
  14. Rev. Lalhmuchhuaka         Phullen Bial
  15. Rev. Lalngaihawma            Phullen Bial

PHULLEN A PRO-PASTOR LO AWM TAWHTE:

Phullen ah hian Pro-Pastor fel leh ṭha tak tak engemaw zat an lo awm tawh a. Suangpuilawn Pastor Bial a Phullen Kohhran a awm lai aṭang khan Pro-Pastor hi neih ṭan a ni a. Phullen Pastor Bial a pian hnu thlengin Pro-Pastor ṭha tak tak kan nei ṭhin a, chungte chu:

 

Sl.no.    Hming         Awmchhung

  1. Vanthangpuia         G Th            1973 – Jan, 1975
  2. K. Lalhmuchhuaka     B Th            1980 – Jan, 1983
  3. Lalchhawnkima     B.A, B.D        1983 – Jan, 1986
  4. Vanlalchhuanawma     B.A, B.D M Th    1986 – Jan, 1987
  5. Lalbiaksanga         B Th            1994 – 1996
  6. P.C Lalbiaktluanga     B.A, B.D        1998 – Jan, 2000
  7. K. Lalengmawia     B.A, B.D        2000 – Jan, 2003
  8. H. Vanlalhriata     B Th, B.D        2004 –

*********************************

PHULLEN BRANCH KṬP MEMBER, MISSIONARY A CHHUAKTE

Phullen Branch KTP Member atanga Missionary a chhuakte chu hengte hi an ni:   

  1. Pi Lalbiaksangi:

Kum 1957 khan Pu B.Taia(L) leh Pi Ṭhakimi te fa 9 zinga pathumna ni turin Phullen-ah khawvel eng a rawn hmu ve a,kum1983 khan Matric zirlai niin,Pathian kohna chhangin,Kum 26 mi niin Pathian tan ahun pum a hlan ta a ni.

    A tirin Thlarau Bo Zawngtute(TBZ) enkawlna hnuaiah Pu Rohmingliana’n a chawma,Ultrasora-ah rawngbawlna a tan ta a ni.Kum 1986/1987 bawr velah Nalichhora-ah a awm laiin Synod-in a la ve ta a,Tripura field hnuai Tuidu Khamber ‘S’ ah thawk nghalin,tun thlengin hetah hian a la thawk ta zel a ni.Kum 1994 khan Pu Dunia Koloi nen an innei a, fanau te nen an khawsa ve ta bawk. Mi inpezo tak niin a thawhtirh hian Rs 300/- chauh  hlawh chungin Nl.Rohmingliani(Martar) kha kum 2 chhung a chawm chhawng ve leh thei tlat a ni.

 

  1. Pi Hmingthanmawii:

Kum 1960 khan Pu Vanbawia(L) leh Pi Lalnghaki te fa 8 zinga a 4-na a tan alo pianga, zirna lamah PUC a passed a ni. Mi nun zawi leh nula nun tluang tak a ni a, Kum 1983 khan Missionary turin  Pathian kohna a chhang ta a. Tuipuibari Kanan thar-ah a thawk ṭhin a ni. Pu Lalnunzira nen an inneia, pasal fanau te nen a thawh zawm zel remchang loa ngaiin kum 1992 September thla khan a chawlhsan ta rih a ni.

   

  1. Pu F.Lalramchuana:

Kum 1958 khan Pu Lianchhingpuia leh Pi Chalṭhiangi te fa 8 zing a naupang ber dawttu ni turin a lo piang a. A naupan lai aṭang rengin Missionary nih chakin inkhual lem naah pawh hmun hla taka Pathian rawngbawl lemah a chang ṭhin.

    Lehka te zir chho vein PUC thleng a kal a, PUC Exam dawn ṭepin a chak ang ngeiin Pathian rawngbawl turin a hun pum a pe ta a ni, kum 1984 February 2 khan Evangelist Teacher ni turin Hmawngkawn-ah he hna hi a zawm a ni. Hemi hnu hian Tripura State a khaw hrang hrang ( Bru ho zingah) a thawk lawr a, Evangelist niin West Phaileng-ah a nupui fanau te nen an thawk leh a, Synod hnuaiah Pathian thu puangdarh in a thawk a ni. Hemi hnu hian Voluntary Pension a chhuakin an chhungkua-in Kulikawn ah an cheng mek a ni.

   

  1. Pi Zaikungi: Pu B.Ngurchhawna leh Pi Aithangpuii te fa hming koh a tan kum 1960 khan he khawvel eng hi a lo hmu ṭan a. A nulat laiin zai lamah hnu hma te nei ve nual in AIR Aizawl Artist a ni ve a ni.

    Kum 1985 vela Kohhran a harhna lo thleng chuan rawn chil vein Pa ropui zia leh Pathian hmangaihna nasat zia hria in a tana nun pek let ve duhna thinlung a nei chho a, kum 1985 hian Pathian kohna chhangin Missionary turin a chhuak ve ta a ni. Keisalam khua ah thawk phawtin hmun hrang hrang ah a thawk kual a, kum 1986 khan Pu H.Vanlalnunzira Kanghmun khua nen an innei a, engemaw chen an thawk dun a, Synod-in nupaa thawh dun remchang a tih loh avangin amah hian a chawlh san a, a pasal hnung zuiin W. Phaileng Centre a hmangin  Pathian thu hril leh puangdarhin an thawk zel a.Tunah hian New Sachan Home Mission ‘N’ ah an la thawk mek zel a ni.

 

  1. Pu Lalroluaha:    

Upa Neihkima(L) leh Pi Thansangi )te fa 10 zing a 3-na atan kum 1952 khan a lo piang a, a tlangval lai hian Kohhran ah a inhmang nasa hle a, Sunday Sikul pawl hrang hrang ah zirtirtu leh Leader hna te thawkin Phullen Branch KṬP Committee, Asst. Secretary, Marka Group Zaipawl Conductor te a ni ṭhin a.Missionary a chhuah lai hian Branch KṬP Secretary a ni bawk. Kohhran leh rawngbawl hna a mi ṭhahnem ngai thei tak a ni. Pathian kohna a dawn te leh nasa zawk a Chanchin Ṭha puandarhna hna thawh a chak avangin Ni 18th April 1986 khan Missionary turin a chhuak a, Tuinaisa(Tripura) ah Evangelist in a awm phawt a, heta ṭang hian hmun dang dang ah te thawk kualin Tuidu Pastor Bial-ah Missionary hna a thawk zawm zel a, tunah hian Chakmagat, Tripura ah a awm mek a ni.

 

  1. Pi Lalhmunsangi:

Pu Lalhriata leh Pi Saikhumi fa 6 zing a 5 na ni turin ni 15 Dec.1964 khan a  lo piang. Pathian rawngbawl lam ngaipawimawh tak a nih avangin BA a zir laiin PHE a LDC hna a thawh chu kalsanin kum 22 mi lek niin Missionary (Evangelist Teacher) turin August 1988 khan a chhuak a. A tir aṭangin kan Synod hnuaiah thawkin Zamuang ah a awm a, chumi hnuah Tuipuibari ah a thawk leh a ni. Kum 1990 ah HS Lalchhuanmawia Missionary nen inneiin fa 3 an nei a, kum 13 zet Missionary hna a thawh hnuin chhungkaw lam harsatna avangin kum 2001 May thla khan huphurh tak chungin a chawlhsan san ta a ni. A chhuah lai hian Electrict Veng Aizawl ah Intermediate Dept. ah zitirtu a ni a, Electric Veng kohhran pawhin a thlahna ropui takin a buatsaih a ni. Tunah hian  a pasal leh fanau te nen Champhai Vengthlangah an awm mek a ni.

 

  1. Pi K. Lalmuanpuii:

Kum 1977 Nikir thla ni khatnaah he khawvel eng hmu ve turin Pu Chanchinṭhahmuaka (L) leh Pi Lalsangpuii te inkarah a lo piang a. Unau 7 zinga a pali na a ni. Mi piangthar ṭha tak a ni a, kum 1999 May thla khan kum 22 mi lek niin Pathian kohna chhang in Missionary turin a inpe ta a ni. A tirah Langkaih Valley Mission chawmin PIPLA ah a awm a, kum 2001 June ah kan Synod in lain hemi hnu July 3, 2002 ah Cherragi ah insawnin..tunah  Zaite Pastor Bial chhung, Zaite Kohhran ah a awm mek a ni. Kum 2007 ah J.Lalrinmawia nen inneiin tun ah hian fa 2 annei tawh a ni.

 

  1. Pi C. Ramropuii:

    Sakhaw mi tak chhungkua aṭanga lo piang chhuakin  Pu Lalhmua leh Pi Lalzawmpuii te fa pathum zinga upa ber niin, Ni 11,02, 1977 khan khawvel eng a lo hmu ṭana a naupan lai aṭang rengin mi nungchang ṭha tak a ni ṭhin. A nulat thleng a lehkha a zir avangin Kohhranah nihna pawimawh a nei hman lo, PUC a pass hnuin Synod Hospital Durtlangah Nurse a zir chhuak a, Pathian kohna chhangin Ni 01.11. 2000 ah missionary in a chhuak a, ni 14 January, 2010 khan Pro Pastor Lalsangliana nen inneiin, tunah hian Agartala Mission Field-ah, Agartala Pastor Bial vawngin an awm mek a, fa pahnih an nei tawh a ni.

 

  1. Gabriel C. Lalrohlua :

Pi Lalhmuchhuaki fa naupang ber ni turin kum  1988 Nov 22 ah he khawvel eng a rawn hmu ṭana, Class IV  zirlai a nih aṭanga Missionary nih tum tlat a ni. Class 12 a zirlai aṭangin Missionary ni tur a inbuatsaihna a nei ṭan a, kan Synod hnuaia Pathian thu zirna Presbyterian Bible School ah te Pathian thu a zir leh phawta, chumi hnuah Pu R Vanlalzauva pawl Mission Foundation Movement rawngbawlnaah kumkhat aia rei hret intuai hriamna a nei leh phawta. Tichuan kan Synod Mission Board hnuaiah Missionary hna a chak em em chu dilin a hmu hlauh mai a. Kum 2010 January aṭangin Nepal Mission Field hnuai Kakarvita Bial, Mangalbare khuaah tun thlengin ala thawk a ni. Kohhran ho pawhin a thlahna hun hman a ni a, KṬP pawhin thlahna thilpek a pe a ni.

    Tv. Gabriel hian kumin (2014) hian Colour Printer ṭha tak mai min pe, tuna kan Souvenir-a thlak kan han tarlan tepawh hi a Printer min pek hmanga kan print a ni a, a chungah kan lawm hle a ni.

 

  1. Nl.Ramdinthari :

Pu.B. Rothangpuia leh Pi Thansangzuali te fa 5 zinga naupang ber dawttu ni turin 25 May 1984 khan alo piang a. Mi hawiharh leh fel tak a ni. Zirna lamah chuan Hindi B.A  a ni. Kum 2011 ah kan Synod Mission Board hnuaiah Missionary hna a dil chu a hmu hlauh mai a. Kum 2012 January thlaah Missionary hna chu a thawk ṭan a ni. Missionary a a chhuah hma hian Branch KṬP Committee member, N.P.S.S zirtirtu, Phullen Pastor Bial zaipawl Member nilai mek a ni. Tunah hian Arunachal East, Makantong Bial, Changlang Kohhran ah a awm mek a ni. Kohhran pawhin athlahna hun a hmang a, KṬP  pawhin thlahna thilpek Rs 2000 a pe ve a ni.

 

  1. Nl. Beiseinasangzuali

    Pu Ramnghahliana fanu Beiseinasangzuali hi tleirawl chhuah phat atanga KTP a inhmang, Kohhran bel tlat mi a ni a. Mi ze zawi lam, nungchang tha tak a ni a, KTP committee member tangkai tak a ni reng thin a. Kum 2018 April ni 4 khan Phullen Kohhran chuan thlahna hun hmangin Missionary turin a chhuak a ni.

 

*******************

PHULLEN PRESBYTERIAN KOHHRAN LO PIAN DAN

Phullen Kohhran hi khandaih khua leh Kohhran kal zel kha a ni a. Tun hmain khaw hmun hi an sawn kual thin a, mumal taka ziaka thil vawn thatte a la ni lo a, an awmna hmun hming kha an pu zel mai thin a. Khandaih khua a lo indin tan ni mahse, Phullen a an insawn hnuah Phullen tih a ni a, Kohhran hming pawh Phullen Kohhran tih a ni ta a ni.

Khandaih khuaah hian August ni 1, 1903 khan Zosap Missionary te leh Bawrhsap ten Khandaih lal Vanphunga remtihnain Sikul nghet an din a. Hei hi Mizoram thingtlang Sikul hmasa ber a ni a. Zosap Missionary ten an hnena lehkha zira awm, Khawnbawl Upa fapa  Hrangsaipuia (Hranga), Kristian tlangval chu Zirtirtu hmasa ber ni turin Khandaih ah hian an tir haw a. Sikulah chuan Pathian thu te a sawiin a zirtir thin a. Tichuan Sikul chu Biak In atan  hman a ni ve nghal a. Pathian thu awih a inpe te awm nghalin Phullen Kohhran (Khandaih Kohhran) chu a lo piang ta a ni.

Khandaih ah hian ringtu hmasa Khuma leh Duma te pawh kalin “Pathian thu lo awih ve tawh rawh u” tiin Pathian thu hrilin khua chu an fang a. Pathian thu awih thar an awm zel a, chung zingah chuan Mizo Kristian Martar hmasa ber Tv Chalbuanga Chhangte pawh kha a tel ve a ni. Khatih lai khan Kristiante khan Isua lama tang an in ti thin a ni awm e. Pathianthu awih an pun ve zel takah chuan Zosaphluia (Rev. DE Jones) leh ringtu hmasate chu November ni 2, 1904 khan Khandaih ah hian kalin, zanah Mualveng Zawlbukah Khandaih Kohhrana ringtu hmasate chu Baptisma a chan tir a. Hei hi Phullen (Khandaih) Kohhran a Baptisma chantir hmasak ber ni a hriat a ni. He Baptisma chantirnaah hian Zirtirtu Hrangan hming a lam a, Tirhkoh Vanchhungan Fenthlirin tui a lo keng bawk a, Pathianthu awih engngemaw zatin Baptisma an chang a ni.

Kum 1905 December ni 3 ah Khandaih khuaah Hripui rapthlak tak a leng thut mai a. Chu hripui chu Pathianthu awihho vanga lo thlengah an ngai leh nghal a, Kohhranho ten lal leh upate huat an hlawh zual phah hle a ni. Kum 1906 April ni 8 ah Tuivaia Sangha an tlangvuak naah mak tak main Thlarau thianghlim Harhna a lo thleng nawlh mai a. Hnuneka Pawite atanga intanin, khawtlang a fanchhuak chiang hle a. Pu Neihruma chuan hla chang a sawi a, kut beng leh ban pharin, hlim takin an lam kual thin a ni. Hetianga mak tak mai a hlim taka zai leh lam bakah, kut beng leh ban phar a lam kual ang chi hi Mizoramah a la thleng ngai lo. Khandaih ah April ni 8, 1906 Pathianni in a thleng a, mak tak mai bawkin Aizawl ah April ni 9, 1906 Thawhtanni ah a thleng ve leh chiah a ni.

Pathian thu awih an lo pun ve zel avangin an khawtlang nun chu rawn tichhe vek dawnin an hria a, lal leh upate chuan an ngaithei lo zual a. Kristiante tirem turin kut te an inthlak a, kum 1906 May thla atangin Kristian tihduhdahna chu a hluar zual ta a. Kohhran mipui ten hrehawm nasa tak an tuar a, khaw dangahte an pem hial a. Khandaih tlangval fel Chalbuanga Chhangte pawh kum 1906 khan tihduhdahna vangin a thi a,  Mizo zinga Kristian Martar hmasa ber a nit a nghe nghe a ni.

Lal leh upa ten Changzawl kai an rel a, kum 1906 Pawltlakah Kawnpuiah Bawk an khawh a. Hetah pawh hian tihduhdahna a hluar zual sauh nghe nghe a, mahse Kohhran mite chu an dinnaah an nghet zual ve zel a. Kum 1907 a Kawnpui atanga Changzawl an kai leh dawn hian, Kristianho chu kai ve an phal lo a, a hnuah Bawrhsap a inrawlh tak avangin an phal sak ve leh ta chauh a ni. Kawnpui an awm lai hian Saithuama hovin Biak In an sa a. Hei hi Sikul ring lova a hranga Biak In an neih hmasak ber a ni.

Changzawl atangin kum 1910/11 ah Thanglailungah an insawn leh a, kum 1911 ah Vanphunga fapa Awksarala chu lal a ni ve ta a. Kristian tihduhdahna a reh tawh a, Kohhran pawh a lo mumal ve a deuh a. Thanglailungah hian kum 1913 khan Phullen Kohhran a a vawi khat nan Kohhran Upa an thlanga, chuta an thlante chu – Ralkaikima, Tuaha, Kuaia, Zokunga te thlan an ni a. Hemi kum hian Ralkaikima, Tuaha, Kuaia te hi Aizawl presbytery in a nemnghet a ni. Thanglailung awm lai hian Sanday Sikul pawh neih tan a ni bawk.

Kum 1914 ah Thirhlumah an kai leh a, heath hian Kristiante erawh tlemte chauh an kai a, a tam zawk chu Phullen lamah an kai thung a. Thirhlum awm lai hian lal Awksarala khan piantharna a chang nghe nghe a. Zawlbuk khuangte chu Biak Inah la lutin hlim takin an zai a ni. Thirhlum a awmte leh Phullen a awmte chu 1916 velah Changzawl Kawnpui ah an kai nawn leh a. Kum 1926 ah Changzawl Kawnpui atangin Phullen ah an kai leh ta a ni. Hetianga an insawn kualna ah hian Kohhran chu nghet takin a ding zel a, Biak In pawh a hrangin an sa thei zel bawk a ni. Phullen kai 1927 hian hmunhlui veng leh lailak inkar kawn zawl nuam laiah Biak In tha tak sak a ni a. Kan lal Awksarala khan Kohhran Pulpit tur tha tak a siam bawk a.

Kum 1949 ah khan Biak In hi a thar a sak that leh a ni a, kum 1952 ah sak zawh ni. Mahse Biak In chu Mizoram buai 1966 khan Vai sipai ten an hal chhe vek a, bungrua tam tak a kang nghe nghe a. Tichuan Biak In chu April ni 2, 1967 ah hmun hran, Kulhkawn leh Pengthuamthum inkar tlang zawlah Paihte vengtlangah sak tan leh a ni a. Kum engemaw zat hnuah hmun thar lamah mi an insuan hret hret a, Biak In pawh chu April 9, 1991 khan thiant tanin, Hmunthar (Vengthar) lam Sub Centre awmnaah sawn a ni a. July 26, 1991 khan Biak In thar  chu luah a ni ta a. He hmunah hian Kohhran chu nung takin tun thlengin a awm zui ta a ni.

 

(Ziaktu : Buata Bawihtlung)

PHULLEN KOHHRAN UPATE

1. UPA LALREMA:
Upa Lalrema hi upa Ralkaikima leh Pi Bawihchhungi te fapa upa ber niin, ni 28.3.1928 ah Phullen-ah a lo piang a. Kum 1946 February ni 22 ah Pi Thanzami nen an innei a, fa pasarih – Mipa 4 leh hmeichhia 3 an nei. 1968 ah Upa atan thlan a ni a, hemi kum vek hian Hmarphei Presbytery in Suangpuilawn Kohhran Biak In ah Phullen Kohhran Upa atan a nemnghet a ni. Upa Lalrema hian Kohhran ah chanvo hrang hrang pawimawh tak tak a lo chelh tawh a. Tualchhung Kohhran Committee Chairman, Se cretary, S.S Superintendent leh Inneihtirna kawltu nihna te a lo chelh tawh a ni. Bialah Bial Chairman leh Secretary nihna a chelh tawhin Synod ah Music Committee ah leh Pastoral Committee ah a tel tawh bawk. B.S.I ah Patron member a ni bawl.

 

2. UPA THANZUALA:
Upa Thanzuala hi Pu Liandailova leh Pi Chawngveli te fapa niin a upa lam atanga chhiara parukna niin kum 1923 May ni 15 ah Hliappui ah a pianga. Kum 1946 October ni 6 ah Pi Rualdailovi nen an innei a. fa pariat (8) – Mipa 4 leh hmeichhia 4 an nei a ni. Upa Thanzuala hi kum 1973 ah Upa atan thlan tlin a ni a, hemi kum vek hian Hmarphei Presbytery in Phullen Kohhran Biakin ah Phullen Kohhran Upa atan a nemnghet a ni. Upa Thanzuala hian Kohhran ah chanvo pawimawh tak tak a lo chelh tawh a. Tualchhung Kohhran Committee Chairman, Secretary leh S.S Superintendent a chelh tawh bawk. Presbytery ah Treasurer ni tawhin Synod ah Executive Committee, Ramthar Board leh Tihdam Rawngbawlna Board ah te a lo tel tawh a ni. B.S.I ah Life Member a ni bawk. S.S zirtirtu kum 25 leh kum 50 chawimawina Certificate, Diploma leh Jubilee a dawng bawk.

 

3. UPA THASAWTA:
Upa Thasawta hi Pu Thangawna leh Pi CHalchhungi te fapa niin a upa lam atanga chhiara palina niin ni 12.1.1936 ah Phullen-ah a piang a. Kum 1958 December ni 17 ah PI. Hrangvungi nen innei in, fa panga (5) – Hmeichhia an nei a ni. Upa Thasawta hi kum 1976 ah Upa atan thlan a ni a, hemi kum vek hian Hmarchhak Presbytery in Khawlian Kohhran Biak In ah Phullen KOhhran Upa atan a nemnghet a ni. Upa Thasawta hian Kohhran ah chanvo pawimawh a lo chelh tṭawh te chu – Tualchhung Kohhran Committee Chairman te, Bial Standing Committee te, Presbytery Standing Committee te niin kum 2005 ah Bial Chairman tura ruat a ni bawk. B.S.I ah Patron Member a ni bawk. S.S zirtirtu kum 25 chawl lova a thawh chawimawina Certificate diploma a dawng bawk.

 

4. UPA RAMZAUVA:
Upa Ramzauva hi Pu Thangruma leh Pi Chhunṭhuami te fapa, a upa lam aṭanga chhiara parukna niin kum 1939 June ni 15 ah Phullen-ah a piang a. October 26, 1961 ah Upa atan thlan a ni a. Hemi kum vek hian Tuivai Presbytery in Phuaibuang Kohhran Biakin ah Phullen Kohhran Upa atan a nemnghet a ni. Upa Ramzauva hian Kohhranah chanvo pawimawh chi hrang hrang a lo chelh tawh a. Tualchhung Kohhran Committee Chairman, S.S Superintendent leh Inneihtirna Kawltu nihnate a lo chelh tawh a, bial ah bial Chairman a ni tawh bawk. Presbytery ah Moderator ni tawhin Synod ah S.S. Committee, Pastoral Committee, Executive Committee leh Publication Board Committee Member nihnate a lo chelh tawh a ni. BSI ah Patron member ani bawk.

 

5. UPA B. PAHLIRA:
Upa B. Pahlira hi Pu Kaichhinga leh Pi Kawlsuali te fa, a upa lam aṭanga chhiar a pangana a ni a. January 1, 1940 ah Phullen ah a piang a, March 18, 1975 ah Pi Lalneihsangi nen an innei a, fa panga (5) – Mipa 2 leh Hmeichhia 3 an nei a ni. Upa B. Pahlira hi kum 1986 ah Upa atan thlan a ni a, hemi kum vek hian Phullen Kohhran Biakin ah Tuivai Presbytery in Phullen Kohhran upa atan a nemnghet a ni. Pu8a B. Pahlira hian Kohhran ah chanvo pawimawh tak tak a lo chelh tawh a – Tualchhung Kohhran ah Kohhran Committee Chairman te, Secretary, S.S Superintendent leh Inneihna kawltu nihnate a chelh tawh a. Bial ah Bial Chairman, Secretary, Treasurer leh Bial Auditor te a ni tawh bawk. Presbytery –ah Secretary, Treasurer, Auditor leh upa Examiner ahte a ṭang tawh bawk a. Synod ah S.S Committee leh Pastoral Committee-ah te a tel tawh bawk. BSI ah Patron member a ni bawk.

 

6. UPA LALHRANA:
Upa Lalhrana hi Pu Suakṭhuama leh Kailianpuii te fa niin unau pahnih zinga a upa zawk a ni a. December 9, 1930 ah Phullen-ah a lo piang a. February 15, 1951 ah Pi Neihmawii nen an innei a, fa sawm (10) – Mipa 6 leh Hmeichhia 4 an nei a ni. Upa Lalhrana hi kum 1989 ah Upa atan thlan a ni a, hemi kum vek hian Tuivai Presbytery in Vanbawk Kohhran Biakin ah Phullen Kohhran Upa atan a nemnghet a ni. Upa Lalhrana hian Kohhran ah chanvo pawimawh tak tak a chelh tawh a. Tualchhung Kohhran Committee Chairman, S.S Superintendent, Bial ah leh Presbytery ah Standing Committee ahte a tel tawh bawk. Kum 1962 aṭanga 1994 thleng S.S hna banglova a thawh chawimawina Diploma a dawng bawk. BSI ah Life Member a ni bawk.

 

7. UPA  ZAHNUNA:
Upa Zahnuna hi Pu Thanzuala leh Pi Laldailovi te fapa upa ber a ni a, July 28, 1953 ah Phullen ah a piang a. May 20, 1992 ah Pi Lalnunchhuangi nen an innei a, fa pathum (3) – mipa 2 leh Hmeichhia 1 an nei. Kum 1993 ah Upa atan thlan a ni a, hemi kum vek hian Phuaibuang Vengthar Biak In ah Tuivai Presbytery in Phullen Kohhran upa atan a nemnghet a ni. Upa Zahnuna hian Kohhran ah chanvo pawimawh tak tak a lo chelh tawh a. Tualchhung Kohhran Committee Chairman, S.S Superintendent, Bial ah Auditor te ni tawhin Presbytery-ah Standing Committee te leh Synod ah Music Committee a ni tawh bawk BSI ah Life Member a ni bawk.

 

8. UPA LALRINZAUVA:
Upa Lalrinzauva hi Pu Tlanzova leh Pi Aichhingi te fa upa ber niin ni 20.10.1948 ah Phullen ah a piang a. March ni 3, 1972 ah Pi Zoramthari nen an innei a. Fa panga (5) – Mipa 2 leh Hmeichhia 3 an nei a ni. Upa Lalrinzauva hi kum 1993 ah Upa atan thlan a ni a, hemi kum vek hian Phuaibuang Vengthar Biak In ah Tuivai Presbytery in Phullen Kohhran upa atan a nemnghet a ni. Upa Lalrinzauva hian Kohhran ah chanvo pawimawh tak tak a lo chelh tawh a, tualchhung Kohhran ah Secretary, S.S Superintendent te a ni tawh a. Bial ah Secretary te, Tresurer te leh Statistician nihna te a chelh tawh bawk. Presbytery ah Standing Committee, Nomination Committee Member te ni tawhin Synod ah Pastoral Committee Member a ni tawh bawk. BSI ah Life member a ni bawk.

 

9. UPA LALTHARZELA:
Upa Laltharzela hi Pu Dengkhuma leh Pi Saichhingi te fapa, upa lam aṭanga chhiara pasarihna niin Ni 21.4.1948 ah Phulleh ah a piang a. October 21, 1977 khan Pi Vanlalpuihi nen an innei a, fa pali (4) – Mipa 3 leh Hmeichhia 1 an nei a. Kum 1999 ah Upa atan thlan a ni a, hemi kum vek hian Suangpuilawn Kohhran Biak In ah Tuivai Presbytery in Phullen Kohhran Upa atan a nemnghet a ni. Upa Laltharzela hian Kohhran ah chanvo pawimawh tak tak a chelh tawh a. Tualchhuang Kohhran ah Secretary, S.S Secretary te ni tawhin Presytery ah Upa Examiner ani tawh bawk. Synod ah S.S Board Committee Member te niin BSI Patron member a ni bawk.

 

10. UPA THANRUMA:
Upa Thanruma hi Pu Zasiama leh Pi Chhuanmawii te fa niin 7.5.1946 ah Phullen ah a piang a, kum 1966 July ni 12 ah Pi Lalrinzuali nen an innei a, fa paruk (6) – Mipa 2 leh Hmeichhia 4 an nei a ni. Upa Thanruma hi kum 1999 khan Upa atan thlan a ni a, hemi kum vek hian Suangpuilawn Kohhran Biak In ah Tuivai Presbytery chuan Phullen Kohhran Upa atan a nemnghet a ni. Upa Thanruma’n Kohhrana chanvo pawimawh tak tak a chelh tawh te – S.S Superintendent nihna te, Bial Standing Committee te leh Presbytery Standing Committee ah te a tel tawh a ni. BSI ah Life member a ni bawk.

 

11. UPA VANLALNUNGA:
Upa Vanlalnunga hi Pu Thankhama leh Pi Biakchhungi te fa, upa lam aṭanga chhiara parukna niin ni 1.1.1958 ah Phullen ah a piang a. November 28, 1989 ah Pi Roneihkimi nen an innei a, fa pathum (3) – Mipa 2 leh Hmeichhia 1 an nei a. Kum 1999 ah Upa atan thlan a ni a, hemi kum vek hian Suangpuilawn Kohhran Biak In ah Tuivai Presbytery chuan Phullen Kohhran Upa atan a nemnghet a ni. Kohhran ah chanvo pawimawh a chelh te chu – Tualchhung Kohhran ah Secretary nihna te, Asst. Superintendent, S.S nihna te, Bial Secretary nihna te hi an ni. Presbytery ah Secretary (Jr) a ni tawh bawk. BSI ah Patron member a ni.

Phullen Kohhran Centenary Souvenir 2003 a tihchhuah atanga lak a ni a. Hemi hnu ah hian UPA F. LALSANGZUALA leh UPA LALLAWMSANGA te hi kum 2013 Presbytery-ah nemngheh an ni tawh bawk a, an chanchin kimchang la rawn tarlan leh tum a ni e.

 

12. UPA F. LALSANGZUALA:
Upa F. Lalsangzuala hi Pu F. Lalramliana (L) fapa niin a nu chu Pi Ramnghinglovi a ni a, Dt. 5th November, 1972 khan Phullen-ah a lo piang a, Dt. 27th July, 1999 khan Pi Lalngaihawmi nen inneiin fapa pathum an nei. Chhungkaw member paruk niin an khawsa mek. Dt. 9th May, 2010 khan Tual Upa atana thlan tlin niin Dt. 30th. Dec. 2012 khan Upa atana thlan tlin leh a ni. Tual Upa tana thlan a nih hma hian K.T.P Asst. Secretary, Secretary niin hetih lai hian rawngbawlna zau zawkah Lalpa`n a dah ta a ni.
Khawtlang lamah Y.M.A Branch Committee member nilai leh Sanitation committee member nilai a ni. A nuam tih zawng ber chu duh dan dan a awm niin a chawhmeh duhzawng ber chu Maian bai a ni.

 

13. UPA LALLAWMSANGA:
Upa Lallawmsanga hi Pu Ngurmawia (L) leh Pi Zoramliani te fa laita ni turin Dt. 8th December, 1977 khan Phullen-ah a lo piang a, unau mipa 3 leh hmeichhia 1 a nei. Dt. 18th December, 2007 khan Pi F. Lalhmachhuani nen inneiin fapa pakhat leh fanu pakhat an nei tawh. Chhungkaw member 13 niin an khawsa mek. Dt. 9th May, 2010 khan Tual Upa atana thlan tlin niin Dt. 30th. Dec. 2012 khan Upa atana thlan tlin leh a ni. Tual Upa tana thlan a nih hma hian Branch K.T.P Asst. Secretary, Secretary, Leader leh Bial Asst. Secretary, Secretary leh Tuivai Presbytery KTP meet hmasaberah Secretary a ni.

Tuna Phullen Kohhran awp mektu Upate hi thiamna lamah mi chhuanawm tak an awm lem lova, nimahsela, Pahtianin a Kohhran te enkawl tura a thlan leh ruat te an ni a. Mifel te chauh thlang lova mi mawl te pawh thlang ṭhin tu Pahtian duhzawnga Phullen Kohhran an awm thei leh kaihruai thei hi a ruattu Pathian ropuizia lantirtu a ni a, Kohhran Upate hi an chhuanawm tak zet a ni.

Kum za liamtaa Kohhran dinhmun kan en lêtin, ringtu hmasa ten chhel tak leh huaisen taka Isua lama an ṭan tlatna rah chu Phullen Kohhran-ah hian a lo lang ta a ni.

 

 

******************

KTP PHULLEN BRANCH LO PIAN DAN

KṬP Phullen Branch (KṬP Phullen Branch lo pian dan chhui zauna – By Buata Bawihtlung)

 

Phullen Kohhran hi Kum 1903 ah Khandaih awm lai khan Zosap Missionary te hmalaknain a lo piang a, Phullen a an insawn hnuah Phullen khua niin, Kohhran pawh Phullen Kohhran tih a ni zui ta a ni. Khandaih Sikul ah khan zirtirtu Hranga khan Pathian thu a zirtir thin a. Tin, Mizo zinga ringtu hmasa Khuma leh Duma te pawh Khandaihah khan kalin “Pathian thu lo awih ve tawh rawh u” tiin Pathian thu an lo hril tawh a. Tichuan, Pathian thu awih an lo awm ve ta a.

Chutia Pathian thu awih an lo awm ve takah chuan Zosaphluia (Rev. DE Jones) chu Khandaih ah hian a kal a. November ni 2, 1904 zan khan Khandaih Mualveng Zawlbukah Khandaih kohhran ringtu hmasate chu Baptisma a chan tir a. Tichuan Khandaih Kohhran chu, khaw hmun sawn te, tihduhdahna te leh hripuite leh harsatna hrang hrang karah a lo thang lian ve zel a. Phullen a an insawn hnu phei chuan Kohhran mipui pawh an tamin, a ngelnghet ve hle tawh a.

Phullen Kohhran a lo pian atanga kum 40 zet a lian hnu chuan, Kohhran huangchhunga thalai zawkte pawh chu tangkai taka hman theih an nih zia Kohhran mipuite chuan an hre chho zel a. Thalaite pual bika inkhawm hun siamte chu tha in an hria a. Tichuan, Phullen Kohhran Committee chuan, August ni 27, 1944 khan Kohhran huang chhunga Thalaite puala inkhawm hun bik siam chu a rel tlu ta a. Pathianni zan, Kohhran mipui inkhawm hma hun chu Thalaihote inkhawmna hun atan a ruahman ta a ni.

Tin, September ni 24, 1945 a Phullen Kohhran Committee ṭhukhawm chuan, Nilai Zan inkhawm mumal vak lo chu tharthawh leh a, Kohhran a thalai zawkte tan Pathian thu leh  kohhran inkaihhruaina kawnga inzir nan hman ni se an ti a. Thalaiho kaihruaitu atan chuan Upa Zulawma leh Kapruma leh Tawnkima (Upa) te chu Kohhran Committee chuan a ruat a. Anni kaihhruaina hian Nilai zan pawh chu Thalaite pual deuh bikin an hmang thin bawk a ni. Heng hun lai hian hmun dangah thalai pual inkhawm a awm em hriat a ni lo a, KTP pawh a la ding lo a, TKP pawh a la ding lo a ni.

Kohhran a lo thang lian zel a, kum 1950 vel khan hmun ṭhenkhatah thalai puala inkhawm neih leh thalai pual pawl bik chu Kohhran thenkhatah din a ni ve ta a. Chung ho chuan inzawmna pawh an nei lem lo a, a hming te pawh an duh duh an inphuah mai a. Kum 1951 July 31 khan Baptist Kohhran ah thalai pawl din an rel a, kum 1952 khan ṬKP din chu kohhran chuan a remti ta a ni. Chutiangin Presbyterian Kohhran ah pawh November 27, 1954 khan Kohhran ṭhalai pual a pawl din an rel a, hruaitu lailawkte an inruat a. SYNOD chuan kum 1954 ah KTP din chu rem a ti a, Kohhran tinah KTP din turin SYNOD chuan thu a chhuah ta a. Tichuan ni 22.2.1954 a an inhmuhkhawm hmasak ber chu ram pumah KTP din ni ah hman a ni ta a.

Phullen Kohhran ah chuan Thalai pual bik inpawlho ṭhin awm tawh mahse, SYNOD in Kohhran tinah KTP din tura thu a chhuah kum 1954 khan Phullen ah pawh KTP hi din ve nghal a ni a. KTP chu chak takin a kal ve zel a. Mizoram buai lai, kum 1967 a Vai (India) sipai ten Phullen Biak In an hal khan KTP minute bu leh lehkhabu engemaw zat a kang ral a, thil tam tak chhui let theih lohin a kang ral nghe nghe a. KTP din tirh khan T.Upa Thanzuala (Upa nit a) kha Phullen Branch KTP Leader hmasa ber a ni a, a dangte erawh hriat mai theih a ni tawh lo a. Kha tih laia KTP Phullen Branch hruaitute chu hengte hi an ni –

  1. T. Upa Thanzuala (Upa)
  2. Lalrema (Upa)
  3. Rokima
  4. Biakchungnunga (Upa)
  5. Thanṭhuama (Upa)
  6. S.Rotluanga

 

Tichuan, Phullen Kohhran ah chuan KTP din hma kum 1944 August 27 ah khan Kohhran a Thalaite pualin inkhawm hun te siam hrangin thalai inpawl khawm lo awm tawh mahse, Mizoram SYNOD in KTP din tura a tih kum, 1954 khan KTP hi din a ni ve ta a. KTP Phullen Branch chu tluang takin a kal zel a. Mizoram a buai lai khan India sipai ten  Biak In an hal a, Kohhran leh KTP thil chhinchhiahna tam tak chu a kang chhia a, a kan hma a an thuhruk hman chhunte pawh a chhe nasa hle a. Chuvang chuan, Kohhran upa tak ni siin KTP din Ni hi hriat chian mai a harsa hle a.

Branch hruaitute chuan Phullen Branch KTP din ni chu tihchian ṭhain a hria a. A hre tur awmte an zawh kual a, an chhui fe hnuah  May 16, 2004 (Sunday) a KTP ṭhukhawm chuan Phullen Branch KṬP din ni chu September 25, 1954 ah a pawm ta a ni. KTP hi, rambuai vangtein inkhawm te khaihlak deuh thin mahse, tluang takin a kal ve zel a, kum 2014 September 25 khan a kum 60-na Diamond Jubilee pawh lawm a ni nghe nghe a. KTP Phullen branch hi a din tirh atangin tun thlengin Kohhran kutke tangkai tak a la ni reng a ni.

 

*********************