INTHAWINA NI LOVIN THUAWIHNA

B. Lalhriatpuia

Leader
KTP Phullen Branch 2014

          Kum za(100) liam ta a khawvel hnam mawl leh bal ber zinga chhiar te kha Pathianin a mi te hmangin min zawng chhuak a. Pathian khawngaihna azarah kum 5000(sangnga) aia rei mah civilization lo chen tawh te nen Computer Age, Electronic Age, Information Technology, Media khawvelah kan lut rual ta reng chu a ni a. Ram changkang zawk te chu an mahni thawhchhuah, hmuhchhuah leh thawh rah ang tawk zelin Agriculture Society-ah, Industrial Society-ah, chutah Information Technology, Computer Age-ah a kum zabi tel zelin step by step-in hma an sawn chho zel a, tun dinhmun hi an lo thleng ta a ni a. Keini chu Pathian khawngaihna azarah Information Society-ah min hlangkai nawlh a, Pathian malsawmna a ni a, a lawmawm a ni. Amaherawhchu hetih rual hian a chhunga cheng Mizo ten kan zir a kan thiam a pawimawh hle mai. A malsawmtu Pathian lam aiin a malsawmah kan inhmang ral em aw a tihtheih ta. Kan sakhua, kan biak Pathian duh dan a nun tak lam aiin a rawngbawlna, inthawina lamah kan kal tam zawk ta em aw !!

ENGE INTHAWINA CHU ? :

Thuthlunghlui hunah chuan an sual ngaihdam nan te, Pathian hnena lawmthu sawi nan te, halral thil hlanah Ran thisen hmang te, eng emaw an thlai thar hmangtein halral thil hlanin an inthawi \hin tih kan hria a, an sakhua serh leh sang, an sakhuain ti tura a phut kan tithei awm e. Tunlai Khawvelah pawh kan sakhaw serh leh sang, rawngbawlna kawng hrang hranga kan thiltih hi kan inthawina kan ti ve maithei awm e.

Heng rawngbawlna kawng hrang hrang a kan thil tih te hi piantharna tak nei silo leh Pathian thu zawm tak tak silo hian a tih theih vek mai. Mizo Kohhran te hi pawn lam lang thei inthawinaah chuan kan ti \ha khawp mai. Biak In kan nei \ha a, kan inkhawmpui dawnsawn danah te kan inelin kan ti \ha khawp mai. Pathian ram thilpekah te, kawng hrang hrang lang theia kan thiltih te hi a \ha, kan inthawi \ha khawp mai.

Kristian |halai te ngei pawh a lang thei a kan thiltih chu a \ha khawp mai. Kan inkhawmpui lian pawh a ropui, a changkang, a felfai. kan nalh, kan mawi, kan zei, kan thiam. Heng rawngbawlna kawng hrang hranga kan thiltih hi a \ha, kan inpekna pawh a sang \hin khawp mai. Amaherawhchu heng a lang apauva kan tih ni lo, lang thei si lo, hmuh theih si lohah hian enge kan an ang le ? Pathiana nun tak nei chuang lo, mahni mimal tlat falna a Pathian thu zawm leh a thu anga nun tum chuang si lo, inthawina ringawta kal ral hi kan tam viau lawng maw !! Hetianga zei tak, thiam leh nalh taka rawng kan bawl mup mup chung hian Kristian |halai te-ah hian heng hi a bang chuang lovem ?

1) NUN TUIHALNA :

Engvanginnge |halaite hi kan nun a zat em em ? Kan phi ruai a, a nuam, a mawi leh changkang kan zawng a, chak takin kan tlan a, programme ngai kan ning a, a thar kan zawng a. A ngaihnawm leh hmuhnawm kan zawng a, kan neih tawk kan duhkhawp lo va, a thar, a mawi, a changkang, a tunlai kan zawng zel a. Nun hahchawlhna, lungawina leh thlamuanna kan nei lo, kan hmu lo.

2) ZALEN CHAKNA :

Mahni duhzawng, chak zawng leh nuam tih zawnga nun chaknain \halaite min tuam mek a, chung lam a khuahkhirhna leh thununna kan ngaitheilo tial tial a, mahni duhdana nun tumna kan nei lian tial tial bawk.

3) MI NGAIHSAN UCHUAKNA LEH INNGAIHNEPNA :

Information Technology, Media khawvelin min hlui, kan \angkaipui leh hlawkpui chu sawiloh, kan chhiatpui leh tawrh phah zawk ni mahse mi/thil ngaihsan uchuakna, kan hmuh phak loh, kan mamawh miah loh, a bul pawha kan kal/awm phak loh te ngaihsan hleihluakna, kan Pathian biak leh rawngbawlna ai pawha kan ngaimawh leh kan buaipui mah mah tawh, kan eizawnna leh nunzia pawh tibuai khawpa ennawm, hmuhnawm, ngaihnawm tih kan va ngah tawh em !!

Hetih rual hian kan hmuh phak leh kan chenpui, kan khawsakpui Kohhran, Khawtlang, Pawl leh Ram min hruaitu te ngaihnepna, eng vaka ngaih bik lohna, an thu pawh zawm tum chuan lohna, a chhe lai apiang hmeh bel tumna, a \ha lam inhmuh sak theih lohnain min tuamin min ei zual zel bawk a. Chhiat \hat kan tawh pawha tawh loh pawha min hre lo, khawvelah kan awm ve a ni tih pawh min hre lo tu ngaihsan uchuak leh buaipui uchuak a, kan bul hnaia mirethei zawk, mi \anpui ngai zawk te hre leh thei si lo, \henawm khawvengte ngur ngur leh si nun changkang intia hawi sang fe fe kan tam mai.

4) INNGAIHZAWNNA |HA LO LEH SEX HLUAR :

Kan nula tlangval, tleirawl, K|P member rual teah a va nasa em !! Kan Media kaltlanga lang chhuak si lo, inphum ru, inngaihzawnna \ha lo, uchuak, sex hluar, neih inang thlenga inkawpna pawh kan Kristian |halai te zingah hian eng ang nge inphum ru anga eng zat nge awm ang.

5) SETANA BIAK :

Mizo Kristian |halai, a langah chuan Kristian \ha awm tak, lang lo lama Setana lo bia kan tam ta mai hi a va lungchhiat thlak em !! Media-in min hlui kan neih phak si loh awhna, itna, tih ve theih chakna, duh ang ang tih theih leh neih theih chakna awhna, itna sual avanga lo piang a va ni chiang em !!

Kan sawi seng lo, heng zawng zawng hi Kristian |halai, nu leh pa tam zawk te ah rawngbawlna, inthawina \ha taka hlan a, ti reng chunga inphum reng a ni. Kan rawngbawlna, nalh taka inchei a, Bible bag ak a zakzeh chunga Biak In a kal \hin, hnatlang \hin, hla zir \hin, faith promise \ha taka pe \hin te ah hian a va inphum nasa em !! Heng hi a ni nun tak nei si lo, thu tak pai si lo rawngbawlna, inthawina chu.

THUAWIHNA :

Pathianin a lawm ber chu ‘thuawihna’ a ni. Kan Bible-ah hian Pathian \ih avanga a thu zawma awih tlat, mahni mimal nun a fala awm pawha Pathian \ih a a thu awih a zawm tlat kan hmu hnem khawp mai. Josefa’n Pathian a \ih a, a thu a zawm tlat a vanga a tawrhna te, tuma hmuh loh chung pawha a pu Potiphara nupui tlansan ngam, sex lamah pawh invawng thianghlim tlat, hlemhletna, huatna diklo lakah pawh invawng thianghlim tlat (Gen. 39), Kristian |halai tlangval dik tak te. Lal Hezekia Pathian \ihna, “Aw Lalpa, i hmaah thu tak leh thinlung \ha famkim pu a ka awm \hin zia leh i mithmuha thil \ha ka tih \hin zia kha khawngaih takin hre reng ang che” (Isaia 38:3), a tih theihna leh a tih ngamna nun te hi a va ropui em !! Pathian ngeng pawh a chhun chiang khawp mai. A nunna pawh a pawhsei sak hial a nih kha. Samuela, tet te a\anga Pathian tana invawng thianghlima Pathian thupek anga huaisen taka nung ngam. Timothea anga nun ngil taka damchhung ni zawng Pathian tana inserh hrang, a thu zawm hmasa a a rawngbawl a inthawina nung neitu. Kan sawi seng lovang, Kristian |halai ten kan entawn tur Pathian thu anga awm a, nunga, Pathian pawhin a thu anga awm te a kalsan ngai loh zia Bible-ah hian kan va hmu hnem em !! Heng hi entawnin a thu awih, a thu zawm hmasak phawt hi Pathianin a duh a ni tih i hre thar leh ang u.

INTHAWINA NI LOVIN THUAWIHNA :

I Samuela bung 15-ah kan hmu a. Israel fa te Aigupta ram ata hruai chhuah an nih laiin Amalek miten Israel fate kawng an lo dan avangin a hnu feah Pathianin Israel lal Saula hnenah Amalek mite do va an mahni leh an thil neih te, an ran vulh zawng zawng te tumah leh engmah zuah lova tiboral vek turin thu a pe a. Lal Saula chuan Pathian thu ang ngeiin a va do va, amaherawhchu Pathian hnena inthawi nana hlan turin Bawng leh Beram thau \ha \ha a rawn zuahin a rawn hawn tlat mai. Ama ei leh in, nawmchen nan pawh ni lo, Pathian rawngbawlna, a hnena inthawi nan a ni. Mahse engtin nge lal Saula hnenah Pathian thu a lo thlen ? “Lalpa chuan Lalpa thu zawm chu a lawm angin halral thil hlan te leh inthawina te hi a lawm em ni ? Ngai teh, inthawina aiin thuawihna chu a \ha zawk a, Berampa thau aiin a thu pawm chu a \ha zawk a ni. Helna hi aienthiamna sual te nen a inang a, luhlulna hi milem biak leh Pathian lem biak tluk a ni. Lalpa thu i duh loh avangin a ni pawhin lal atan a duh ta bik lo che a ni”(I Samuela 15:22-23), tiin Pathianin a lalna thlengin a hnawl phah ta.

Matthaia bung 12-ah chuan Isua a zirtirte nen chawlhniah buh hmunah an kal laiin an ril a lo \am ta a. Buh vui te thliakin an ei ta a. Chu chu Pharisai ten an lo hmuhin an sakhaw dan inthawinaah chuan chawlhni a chutiang tih chu thianglo a ni. Isua hnenah an rawn hek a, Isua’n engtin nge a lo chhan ? “’Inthawina duh lovin khawngaihna ka duh e,’ tih hi, a awmzia lo hre tawh ni ula chu, mi thiamte chu thiam loh in chantir lo tur.” (Matthaia 12:7) tiin. Pharisai te hi Sakhaw dan inthawina, rawngbawlnaah chuan mi fel sawisel bo, felna lama tuma phak loh an ni. Mahse Lal Isua thu zawm hmasa lova rawngbawlna, inthawina chu Lal Isua’n a lawm chuang lo.

Lal Saula’n Pathian thu zawm aia inthawina, rawngbawlna a ngaipawimawh zawk te, Pharisai ten Lal Isua thu zawm aia Sakhaw serh leh sang rawngbawlna, inthawina an ngaipawimawh zawk te hi Pathian duhzawng a ni lo tih a chiang hle mai.
Mahni mimal nun, tlatfal nuna Pathian thu zawm tum chuang lo, Pathian thu awih tum chuang lo, eiruk duh reng, hlemhletna pawisa lo, huatna suala tim chuang lo, mipat hmeichhiatna a in hnamhnawih hreh chuang lo, mi rethei leh hnuaihnung zawk te khawngaihna, ngaihsakna nei chuang lo chung reng hian mawi takin, inpe takin rawng a bawl theih a, inthawina a hlan theih. Chu inthawina rawngbawlna chuan mite mit a ti mim a, mi hla te hnuh hnaih aiin a ti hla zual zawk thin. Mahni inbumna a ni a, Pathian ram ti zau theilo tu, Pathian tana hnawmhne leh ninawm mai a ni.

Kan nitin mimal nun tlatfalnaah hian enge Pathian duhzawng ti a Pathian thu zawm a, a thu anga nunga a duh dan ang zela zawite a kal dem dem hmasak phawt hi a va pawimawh em !! Chu chu Pathian lawm zawng a thuawih leh zawm hmasak nun chu a ni. Inthawina leh rawngbawlna kan sawisel, kan hlamchhiah ni lovin kan mimal nun hian Pathian \ih phawt sela, a thu angin nungin a thu zawm hmasa phawt ila, chutiang rawngbawlna leh inthawina chuan rah a chhuah a, miten kan nunah ‘nung’ an hmu a, kan zingah tel ve an chakin kan rawngbawlnain Pathian ram a ti zau zel dawn a ni.

Pathian thu zawm lo leh a thu anga nung si lovin rawng a bawl theih a, inthawina a hlan theih a, chu rawngbawlna leh inthawina chu Pathian pawm loh, a lawm loh leh a hnawl a ni. Pathian thu zawm a, a thu awih a, a thu anga nung ten a rawng an bawl a, inthawina thianghlim an hlan thin zawk a, chu chu Pathian lawm zawng thuawih rawngbawlna, inthawina nung chu a ni. Chu rawngbawlna, inthawina chuan hahdamna, thlamuanna, engthawlna, hlimna min pe a, mi te mithmuhah nungin a lang chhuak a, rah duhawm tak a chhuah \hin. Inthawina rawngbawlna ringawt ni lova Pathian thu zawma a thuawihna nena rawngbawlna nei thei turin kan nun i buatsaih thar ang u.

(He thu hi Pu B. Lalhriatpuia, Leader KTP Phullen Branch in a ziak a ni a, KTP Phullen Branch Diamond Jubilee Souvenir 2014 atanga lak chhuah a ni.- Buata Bawihtlung)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: