SUAL A TLÛK THÜ

Rev. HL. Thianghlima, Phullen Pastor Bial.

        Mihring nihna chi hnih- a nihna dik tak leh a hmasa zawk (primary nature) leh a nihna hnuhnung zawk leh chhe tak (second nature) hi inhnialna tichhuaktu leh sawi tawp awm lova sawi hlawh zel tur a nih hmel. 

        Mihring nihna chu thlarau leh taksa, hriatna, felna leh thianghlimnaa Pathian anpuia siam, chhia leh tha hriatna thiang leh duhthlan theihna zalen neia Pathian pawl thin, thilsiam dangte aia ropui leh chungnung zawk a ni. Chu dinhmun chu sualah a lo tlu ta. Suala mihring tluk thu hi Genesis bung thum-a Evi leh Adama te tlukna thu behchhana sawi a ni thin. Mihring suala tluk thu hi kan pawm vek a, amaherawhchu- Tu mawh nge? Suala tlukna chu engnge a awmzia? Tlukna chuan eng chen nge mihring a tihchhiat? tihah hian sawifiah dan a inang ta lo a ni.

        Tu mawh nge?: Suala tluk thu-a mawhphurtu ber chu mihring a ni. Mihring hmasate chu anmahni leh an thlah awm zelte nihna pumpui kengtu (representative or federal head) an ni. Tun laia zirtirna then khatah chuan ‘Evi khan a duh avanga theirah kha ei a ni lo, Diabola (rul) khan a tihder a, duh lo thei lovin a siam a, ama rilru ni lovin Setana thinlung chuan a rilru leh taksa a luah vek avangin duh-luihtirna-in a ei ta a ni,’ tiin an sawi. 

       Duhthlan theihna zalen (free will) mihringin a neih thu hi hlamchhiah loh/sawi bo loh tur a ni. Anmahnia Pathian dan bawhchhe thei an ni a, sual leh tha thliar hran theihna te, Siamtu Pathian thu-awih a nihna leh awih lo thei a nihna te hi sawibo chi a ni lo. Setana avang chauhva ei ni sela chuan Pathianin duh taka a siam, a pawl thinte kha mawh a phurhtir lo vang a, a hrem hek lo vang. 

        Suala tluknain a nghawng: “I ei chuan i thi ngei tur a ni,” tih Genesis-a kan hmuh kha- Pathian thu awih lova a laka helna chuan thihna a thlen a, nunna bulpui Pathian nen an in-mihran tihna a ni.

        Suala tlukna hian mihring nihna thenkhat a tichhia a ni mai lova, a nihna pumpui a a tikhawlo, ti-hmelhem a ni. Tluk hmaa a dinhmun, Pathian a pawl theihna (bond between God an man) kha Tihkhawloh (Corrupted) a ni. Hei hi then khat chuan Chhe lailet der (totally depraved) niin an sawi thin a. Mihring chhiatna chungchanga Bible tawngkam lar zualte chu: Changpat ang lek; thil lung ang mai; pum chhung atanga suala pai; rul thlah; silhfen bawlhhlawh; suala khat; sual tinreng ti thin (Joba 25:6; Sam 22:6; Sam 51:1; Mat. 3:7; 12:34; 15:19; Mk. 21:22; Isaia 64:6; Thup. 9:3) te an ni a. Jer. 17:9 ah chauh ‘chhe lailet der’ tih tawngkam hi kan hmu. Bible lehlin tharah chuan ‘Siam that har khawpa chhia a ni,’ tiin dah a ni a, footnote-ah ‘chhe hneh tak a ni,’ tih theih a ni tiin a dah bawk.

        Saptawng Bible hrang hrang-KJV, NKJV, RSV, NRSV, JB, NASB, NIV-ah te hian chhe lailet der (totally depraved) tih hi hman a ni lo bawk a ni. Corrupted/totally depraved-in a sawi tum ber chu- kan mihring zia tinreng hi sualin a fan loh a awm lo, kan nihna pumpui hi sualin a bova bang awm lovin min fan chhuak vek a ni, tihna a ni.

        Sualin mihring a tihkhawlohzia leh tihchhiatzia kan sawiin, mihring chu Pathian tan chhanchhuah theih leh duh tlak, mihring lamah pawh Pathian lam duhna la awm zel leh chu lam ngaihven thin a nih hi hmaih loh tur a ni.

        Chhiatna hmuna awm mihring chuan ngaihtuahna fim (reason), chhia leh tha hriatna (conscience), hriatna (understanding) leh duhthlan theihna zalen (free will) kan la nei. Pathian hriatna pawh mihringin kan la nei a, tlukna avanga tihkhawloha kan awm tawh avang erawh chuan Pathian lama hawikir tur leh a duhzawng ti turin Thlarau Thianghlim puihna tel lo chuan chakna kan nei tawh lo a ni.

(He thuziak hi Rev.HL.Thianghlima, Phullen Pastor Bial ziak, Facebook Group atanga lak chhawn a ni. – Buata Bawihtlung)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: