LALPA AWMPUINA LEH THLAMUANNA

By: Chawnglianthuama – Missionary

 

Mizo National Front rammute zinga ka tel ve hnu kum khat leh a chanve velah chuan Phullen Prebyterian Kohhran Biak Inah Nilai zan inkhawmna a thusawi turin ruat ka ni a. Zan inkhawm dar rik tawh hnuah chuan Suangpuilawn lam atangin India sipai Phullen khuaah an lo lut dawn tih Phullen Village Council Member pakhat chuan min rawn hrilh a. Ani duh dan chuan ramhnuai lamah insaseng ila a that a ring a.

Presbyterian Biak In bul lawk chu Pu Awksarala Sailo Phullen Lal huan a ni a. Ani a thih hnuah pawh a huan chu, Lal Huan Tlang’ tih a nit a reng a. Lal Huan Tlang chhipah chuan India sipai Phullen khuaa an lo kal apianga an awmna tur Camp sak a ni a. Ka nupui, Lalringliani hnenah chuan, ‘Engtin nge ni dawn?’ tiin ka zawt a. Pahtian Kohhranin a lo ruat tawh chu phatsan lovin thu chu sawi ngei turin min duh thu a sawi a. Kan fanu upa ber, Vanlalmuani chu kum khat pawh a la tling lo deuh a. Biak Ina inkhawm tur chuan kan inseam ta a. ‘Khawtlang hruaitute duh dan chu a ni si lova,’ tiin ka ngaihtuah neuh neuh a. Ka nupuiin Pathian thu sawi ngei tura min duhna chu a nemnghehna atan, ‘Malin ka awm lawng,; I hnenah ka awm; Amam min awmpui a tiam si; Mahriakin ka awm ngai  lawng’ (KHB 435) tih hla hian Pathian chuan min rawn thlamuan ta a.

 

Biak In panna kawngah chuan ka ngaihtuah chhunzawm ta zel a. Biak In Pulpit-a ka lawn hnu, Bible ka chhiar zo chiah tihah chuan India Sipai Suangpuilawn atanga lo kalte chuan an Camp, Lal Huan Tlanga mi chu an rawn thleng ve chiah a. Biak In Chawkidar chuan Inkhawm Chairman Upa Thangdailova chu a rawn hril a. Chairman chuan mi rawn hrilh leh chhawng a. Mipui inkhawmte chu an che sup sup a. Thu chu sawi lovin Pulpit atang chuan chhuk mai ila min duh tih chu a hriat theih a.

 

Nimahsela Pulpit atanga chhuk chu ka tum lova, Pathian thu sawi ngei chu ka rilruah a len zawk avangin ka chjhunzawm ta zel a. Nilai zan atana ka lo inbuatsaih pawh chu sawi lovin Pathian Hla atanga Pathianin min hriattir lam chu ka sawi ta zawk a. “Khawvel lam thil ngawta ka’n ngaihtuah chuan Ram Buai hi kan chhiatpui nasa tawh fa. Sipai nun a rawng a, an silai a hlauhawm a; mahni hna thawk thei lovin puak phurh leh vuak, thih hlauhawm karah kana wm mek lai pawhin Thlarau nena inpawl reng mite hnenah chuan Lalpan thu a sawi zel dawn a ni..” tiin ka sawi ta zawk a. Inkhawm banah chuan, ka nupuiin, ‘I thusawi lai khan sipaiin rawn man che mah sela Pathian thu sawi tura Kohhranin a ruat tlansan ai chuan a tha zawk reng reng..” a ti nghe nghe  a.

 

Inkhawm banah chuan thian thenkhatte chu kan inah an lo lut  hlawm a. ‘Zanina I thusawi chu..” an rawn ti nak nak hlawm a. Mi thenkhatte chuan India sipaiin mi man ang tih hlauh avangin thusawi chu an lo ngaithla hlei thei lova. Mi thenkhatte erawh chuan “Kan boruak tawn lai mek atan a va tul ve,” an ti bawk a. A ni the tak e, tuarna leh harsatna inang theuh theuhah hian kan chhiatpui emaw kan tulpui emaw a la nize dawn e.

 

Hmatiang hmuh lawk loh kawng,
Hlauhawm a hnai thei;
A hnai zawk Chhandamtun,
‘Thlamuang rawh,; min ti.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s