Upa Lalrema Nite

(KTP Facebook Group a ka dah hi hetah hian kan suan lut ve leh ang e.)

Upa Lalrema, Phullen Kohhran

Upa Lalrema, Phullen Kohhran

26.08.2013 Monday:

Zanin hian Phullen Kohhran Hall-ah KTP Phullen Branch, Upa Lalrema Group ten“Upa Lalrema Nite” a hmang niin ka lo hria a, ka mi ngaihsan em em mai puala he hun an siam hi ka hlut em a, ralkhatah a chanchin tlem ka hriat theih ang angte ka lo la khawm ve e.

Upa Lalrema hi upa Ralkaikima leh Pi Bawihchhungi te fapa upa ber niin, ni28.3.1928 ah Phullen-ah a lo piang a. Kum 1946 February ni 22 ah Pi Thanzami nen an innei a, fa pasarih – Mipa 4 leh hmeichhia 3 an nei. Kum 1968 ah Presbyterian Kohhran Phullen Upa atan thlan a ni a, hemi kum vek hian Hmarphei Presbytery in,Suangpuilawn Kohhran Biak In-ah Phullen Kohhran Upa atan a nemnghet a ni.

Upa Lalrema hian Kohhran-ah chanvo hrang hrang pawimawh tak tak a lo chelh tawh a. Tualchhung Kohhran Committee Chairman, Kohhran Secretary, S.S Superintendent leh Inneihtirna kawltu nihna te a lo chelh fo tawh a ni. Pastor Bialah,Bial Chairman leh Secretary nihna a chelh tawhin a, Mizoram Synod-ah Music Committee-ah leh Pastoral Committee-ahte a tel tawh bawk. Bible Society of India-ah Patron member a ni bawk.

Amah hi pa titi thiam leh rualkawm thiam tak a ni a. Puitling leh naupang, eng ang mi pawh, an milpuiin a kawm thiam em em a, he a mizia chhuanawm tak avang hian miten an ngainat lehzual phah em em a ni. Upa Lalrema hian Fiamthu a duhin, a hlim thei em em a. A bula awm a hahdamin, hlim takin a bula mite a kawm thiam thin, chuchu midangte aia a ropui bikna pawh a ni.

Upa Lalrema hi pa tawngkam thiam tak a ni   tih chu, a lawina kohhran te leh Bial chhung mipuite pawhin kan hre deuh vek ang. Kohhran hnatlan nikhuaahte, khawmpui nikhuaahte midang a ti phur thiam em em thin. Kohhran hunpui, Pastor induction service-ahte, lo lawmluhna thu te, fuihna thute, leh Pastor kalchhuak tur thlahna thuchah sawi kawngahte, tawi fel tak siin, fing tak leh fiah takin thu a sawi thiam em em a ni.

Upa Lalrema chanchin hi sawi tur a tam em em a, Sakhaw rawngbawlna lam ni lo, a achanchin mi sawi ka hriat reng pakhat chu Upa Rema hian Phullen-a dawrkaite hnenah “kan chhungkuain in dawrah Bâ kan nei em? Pek loh te kan lo nei lo maw?” tiin a zawt kual ṭhin an ti.  Hetiang hian a ti ziah em chu ka hre lo a, mahse he a mizia aṭang hian,pa hawihhawm tak, midangte tâna phurrit siamsaktu nih a duh loh zia a lang chiang hle.

Upa Lalrema hi Atu leh fate tan mai ni lo, Pathian leh a Kohhrante tan mi tangkai,  mi chhuanawm tak leh hlu tak a ni a, Pathian malsawmna chang zel a, nun nuam taka dam reng turin ka duhsak tak zet.

Awle, Zaninah a puala Group Nite hman tur ka hriat hnua ka rilru a lo langte  chawpchilh takin ka han tarlang a, a chanchin hi kan sawi seng lo ang. Zanina Upa Lalrema puala hun hmangtute zawng zawng pawh, hlim taka hun hmang turin ka duhsakna ka hlan a, Mahni hmuh theiha mite, an damlai ngeia chawimawi thintute, an puala Group siamtute fak an phu e.- Buata Bawihtlung

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: