Author Archives: buata_bawihtlung

PATHIAN LEH A KOHHRAN TANA MI TANGKAI UPA THANZUALA PHULLEN KAN CHAN TA

– Buata Bawihtlung 29.06.2017, 11:30 PM @ TKTAZL

 

IMG-20170629-WA0023

Vawiin chu, zinkawng ka zawh mek laiin kan Kohhran Upa senior, Phullen Kohhran banpui pawimawh em em, Phullen pa ropui leh mi hmasa Upa Thanzuala kan chan thu ka lo hria a. Ka ui ve ngawih ngawih a ni. Upa Thanzuala chanchin hi hriat belh ka chak thin hle a, ama ti ti ngei ngaihthlak ka chak thu ka sawi fo thin a, hun remchangah kawm ngei ka duh thu a tupa Er C-a hnenah ka sawi leh ringawt thin, mahse khua ka tlai zo ta si. A chanchin tam tak zingah, tlem tal hi ka rawn pho chhuak ang e.

Upa Thanzuala kha Pu Liandailova leh Pi Chawngveli te fapa a ni a. Kum 1923 May ni 15 khan Hliappui ah a pianga. An unau hi paruk niin mipa pathum leh hmeichhia pathum an ni. Tlangval fel leh sa tha lam a ni a. Kum 1946 khan Phullen nula hmeltha Pi Rualdailovi (L) nen an innei a. Hetih lai hian India Sipai a ni tawh a ni. A nupui Pi Rualdailovi nen khan kum 1946 October ni 6 ah an innei a, fa pariat (8) neiin, Mipa 4 leh hmeichhia 4 an ni. Tu leh fa pawh thahnem tak a nei a ni. A nupui Pi Ruali khan kum 87 mi niin Ni 20.02.2014, zing dar 7:05 AM khan a pasal hi a lo kalsan tawh a.

Upa Thanzuala fate chu:
1. Ramthianghlima H/o Zosangzeli – Phullen
2. Laltlansai W/o C. Lalsanggluaia – Aizawl, Ramthar veng
3. Upa Lalthangzauva H/o Lalbiakchhuangi – Phullen
4. Lalnunchhuangi W/o K. Lalhmachhuana – Phullen
5. Lalremsangi W/o Lalthanzuala – Winchester, Assam.
6. Vannunziri(L) W/o C. Thangchhuna – Chaltlang, Aizawl.
7. Lallawmawma H/o Lalnunmawii – Phullen.
8. Lalhmingzova H/o Vanlalkhawhluni – Capital Complex, Aizawl

Upa Tanzuala kha pa lian tak ni lo mahse, a pian a nghet thain, a thatlai phri chuan a chak tha hle a. A pumraw tet a en chi a ni lo an ti thin. A rualpuite zingah inbuan chak a sawi a ni a. Sipai a tan lai pawhin, a chakzia leh a duai loh zia a hriat zel a. Sipai infiamnaah an Batalian aiawhin Lungdenah a chhuak pha hial thin a ni. Hei hian a pumrua a en chi a ni lo tih a tilang awm e.

Upa Thanzuala kha lehkha zir sang lo mahse, lehkhathiam a ni a, a rualpui zingah a thiam ber zingah a tel thin a. Lower Primary pawh kum 1936 khan First Division ah pass ngat a ni. Khawvel Indopui pahnihna lo chhuakah India (British) pawh a tel ve avangin Lehkha hi a zir chhun zawm thei lo a. Mahse a finna leh a thluak thatna hi a hnu thlengin a lang a. Sipai an tanlai pawhin tawng a thiam chak hle a, Vai tawng leh Sap tawng thiam a sawi a ni. A mimal eizawnna piah lamah, Kohhran leh khawtlang pawhin nasa takin a finna hi a chhawr a ni.

Tlangval hrisel leh chak tha a ni a, kum 1942-ah khan kum 20 mi niin India Sipai ah a lut a. Amah a fel bawk a, lo te Sipaia a tan hnuah Naik a kai nghal mai nghe nghe a ni. A sipai tan lai hian Silai leh ralthuam nena ral kap tu lamah awm lovin, Sipai inbiakpawhna lam hna “Signal” lamah a awm thin. A hna avangin hmun hrang hrangah a kal kual a, Japan ral nena inkahna rapthlak thlenna Kohima ah te, Burma lam ahte a tel ve a ni. Burma an awm lai hian kulh hming thang tak, Siampahranga Kulhte luhchhuak tute zingah a tel a. He kulh beihnaah hian Wireless Operator ah a tanga. Hemi tum hian pawisa dahna In an veng a, an hotuten insaseng turin leh, pawisa pawh an duh zah zah la turin an tia, mahse an la lo a. Paihte pakhatin Rs 100 a la a, thui tak, chawhma kal vel a hla an insaseng hnuah Paihte pa chu an dil ve leh hnuhnawh a ni awm e.

Kum nga awrh Sipaia a tan hnuin, India in British laka Independence a hmuh kum tak, kum 1947 khan Sipai atang hian a chawl ta a. Sipai a tan chhung hian a che tha hle a ni tih a hriatna chu, kum 5 lek sipai a tan chung khan, Naik a kai thuai a. Naik mai bakah Arsi 2 leh Tangkapui 1 pawh Poona ah hlan a ni nghe nghe. An hunlai ngaihtuahin, hetiang chawimawina a dawng thei hi, a namai lo hle a, a chhuanawm tak zet a ni.

Mizoram buai hma kum 1960 khan kan khua – Phullen Dak In ah hian Postmaster hna a thawk tan a. Mizoram a lo buai tak avangin kum 1966 khan a hna atangin a chawl a. Sipai bang a ni a, Signal lam thiam a nih avangin MNF lam ten Sipai zawm ve turin an sawm a. Ram hmangaihtu thinlungpu ve ta chu, MNF volunteer chu a zawm ve ta a. MNF ah hian rei awm lovin a hna ngai Post Master hna chu a thawk chhunzawm leh a ni.

Kohhran leh khawtlang tan mi tangkai tak, sulhnu ngah tak a ni a. Mizoram buai hma kum 1960-1963 VC Term ah khan Pu Tawnkima (Upa) VCP na hnuaiah khan Phullen VC Member a lo ni ve tawh a. Kha tih laia a VC te chu Pu Tawnkima (Upa) VCP, Pu Biakchhunga VP, Pu Kapthianga Secy, Pu Members – Thanzuala (Upa), Pu Lalenga, Pu Rokima te an ni. Tin, kan khua a Consumer Society tha tak leh changtlung tak din a nihna kawngah khan a sulsutu zinga mi leh a bul tantu zingah khan a tel ve a ni.

Upa Thanzuala hi Pathian tih mi, Pathian leh a Kohhran tana mi tangkai tak a ni a. Kum 1937 khan Pathian leh a Kohhran hmaah Baptisma a chang a. Sipai atanga a chawlh hnu hian a theih ang tawkin Pathian leh a Kohhran tan rawng a bawl a. Chanvo pawimawh tak tak pek nghal a ni a. Sipai atanga a chawlh kum 1947 hian Sundae Sikul ah Zirtirtu ah lak nghal a ni a. Kohhran tan a tangkai em em a. Kum 1950 khan Phullen Kohhranah Tual Upa a ni a, kum 1968 thleng Tual Upa a ni a. Upa Thanzuala hi kan Presbytery huam chhungah SYNOD Preacher kan neih chhun a ni a, kum 1952 khan SYNOD Preacher hi a lo pass diam tawh a ni.

Kum 1944 August ni 27 atang khan Phullen Kohhran ah Thalai pual inkhawm Pathianni zan mipui inkhawm hmain ruahman a ni tan a. Tuna KTP kan tih tak hi kum 1954 kum tawp lam khan Phullen ah din ve a ni ta a. Upa Thanzuala hi KTP Phullen Branch din a nih khan KTP Leader hmasa ber a ni nghe nghe a ni. Kum 1973 February ni 13 khan Kohhran Upa atan thlantlin a ni a, hemi kum vek October ni 14 khan Hmarphei Presbytery chuan Phullen Kohhran Biak Inah Kohhran Upa atan a nemnghet a ni.

Upa Thanzuala hian Kohhran ah chanvo pawimawh tak tak a lo chelh tawh a, sawi vek sen a ni lo. Tualchhung Kohhran Committee Chairman, Secretary te, Puitling leh Naupang lam Sandae Sikul Superintendent te a chelh tawh a. Presbytery ah Treasurer ni tawhin Synod ah Executive Committee a ni tawh bawk a, Ramthar Board leh Tihdam Rawngbawlna Board ah te Synod a STRB ah te Executive Committee a lo nih tawh bakah, Presbytery sum ziaktu leh Auditor hna te, te a lo chelh tawh a ni. Amah hi B.S.I ah Life Member a ni a. Sandei Sikul zirtirtu kum 25 leh kum 50 tling chawimawina Certificate bakah, Diploma leh Jubilee hial a dawng bawk a ni. Heng a thil dawn hi mi bik tan lo chuan dawn theih loh ti ila a dik hial awm e.

Hun rei tak Pathian leh a Kohhran tana rawng a bawl hnuin, a kum a lo tam ve tial tial a. A taksa chakna pawh a tla hniam ve hret hret a. Tlem lai khan a pum a na vak a, a pum chu a puar bawk a, chhungkhat lainate bakah khawtlang mipui kan chi-ai hman lek lek a. Pathian zarah damna a chang zui hlauh a. Chutia tha taka a awm mek lai chuan vawiin ni 29.06.2017 Thursday chawhnu dar 2:00 PM khan a chenna In Phullen natlawk nei lem lovin min boral san ta a ni.

Hetiang taka pa ropui, Kohhran leh khawtlang tana mi tangkai Phullen khawtlangin kan chan ta mai hi a hrilhhai thlak tak zet a. A kalsan tak a chhungkhat laina, a tu leh fate mai bakah, a rawngbawl sak Kohhran mipuite leh Phullen khawtlang tan channa nasa tak a ni a. A hmunruak luah zo tur an awm dawn si lo a, kan ui tak zet zet a ni.

*Biangbiakte leh Thulaknate*
👉🏼Phullen Kohhran Souvenir
👉🏼Tv PC Ramdinthara (Upa Thanzuala tupa)
👉🏼Pu V.Vanthuampuia

# *_Mobile Phone ah ka type zet a, a sei lutuk a vangin Computer ah ka ti leh a, ka enfiah uluk hman ta lo. Dik tawk lo leh hriatsual palh a awm chuan, a dik zawk kan in hrilh hre dawn nia. – Buata Bawihtlung_*

*******************************************

Phullen Kohhran Biak In Thlahna Inkhawm

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang vuain hla an hruai a. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

 

PHULLEN PRESBYTERIAN KOHHRAN BIAK IN THIAH A NI TA

Phullen Presbyterian Kohhran chuan  hun rei tak an lo hman tawh Biak In pui chu Ni 30th May 2017 Thawhlehni khan ṭhiah  ṭan a ni ta a. Kha leh chen hlim tak leh nuam ti taka Pathian biak nana lo hman tawh hetia han thiah tak mai chu, hmasawnna tur leh Biak In thar neihna tur mah nise, a lunglen thlakin, hnuk a ulh ve lek lek thei nia.

Phullen Kohhran Biak In thiah5

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang an vua a, Keyboard Tv. H.Lallawmkiman a tum a, Pu Malsawmdawngzela (Lalmama) chuan Aurinna (Mike) a chang a, anni ho chuan zai an hruai a ni. Ban hla bikah hian Pu David Lalrinawma chuan Aurinna (Mike) a chang ve thung a ni. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

Phullen Kohhran Biak In thiah

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

Ni 30th May, 2017 Thawhlehni hian Kohhran pum huapin Biak In ṭhiah chu ṭan a ni a. A tirah Kawngkhar leh Tukverh frame te lak thlak hmasak a ni a. Chumi hnuah a chung rangva thiah chhun zawm leh phawt a ni a, tichuan a dang pawh ṭhiah zui zel a ni. Hemi ni hian a chung leh a bangte leh ceiling te thiah vek hman a ni. He Kohhran hnatlang ah hian Phullen khawchhunga Kohhran dang atangtein hnatlang a thawkchhuak mi engemaw zat an awm a, Phullen Kohhran mipuite an lawm tak zet zet a ni. He hnatlang chawchhun hmeh tur hi Kohhran Pavalai pawl ten an tum a, Vawksa tui tak an hmeh a. Hemi ni hian Kohhran mipui mi 200 vel zet an hnatlang a, kan Kohhran Upa min Upa Lalrema pawh chak vak tawh lo hle chungin a thawkchhuak thei a, Kohhran choka lamah a lo hnatlang ve a ni.

Ni 1st June, 2017 Ningani hian JPC General Body meeting Kohhran Hall ah neih a nih avangin Biak In thiah hnatlang hi chawlh lailawk a ni a. A bakah chuan ni 31st May 2017 Nilaini atangin Kohhran hnatlang neih chhun zawm zel a ni a. Ni 5th June, 2017 Thawhtanni hian hnathawh tur bik in ruat inruatin hnatlang neih leh a ni bawk.

He kan Biak In thiah hnatlangah hian Kohhran mite inpekna a fakawm hle a. Kohhran mipuite bakah, Kohhran dang atanga kan Biak In thiah hnatlanga rawn thawkchhuak, mitlawmngai thahnem tak an awm a. Hetianga thanemngai taka hnatlanga chhuak an awm leh Kohhran dangte atanga hnatlang chhuak an awm thin hi a lawmawmin, a ropui tak zet zet a  ni.

Vawi tam tak kan lo lawiluh ve na thin, kan Kohhran Biak In, thiah a nih takah chuan, hmanlai an chang ve ta mai dawn a ni a. Nimin lawka ding luah thin kha, tunah chuan a tak hmuh tur a awm ta lova, thlalak leh suangtuahna mitthlaah lo chuan hmun a chang ta lo. Ava lunglenthlak tehlul em!

Nakin lawkah chuan, thangthar ten suangtuahnain an thlir kir ang a, thawnthu angin a chanchin an la sawi ang a. Chutih hunah chuan keini hi kan la dam a nih pawhin, mittui hnam sawk sawk chungin kan la mitthla let thin ang a. Kan mitthla chuan he kan Biak In thiah tak hunlaiah min hruai kir thin tawh dawn a ni.

He kan Biak In hi, hmun hran hranah awm bosan lawp lawp thin mah ila, ka tan chuan hei aia Biak In nuam leh hlu hi a awm thei bik lova, hei aia ropui pawh hi a awm bik hek lo. Mihring hmasawnnain hmalam a pan zel a, sak that a lo ngai ta tlat si a. Hetia thiah a lo tul ta hi, a lunglenthlak zawnga thlir chuan, mittui a lo hnai nghal vat thin. Ka va han ui tak em!!

Mahse, kha kan Biak In ngei mai, kan ui em em leh kan ngaih em em kha, a nawmna leh a hlutna te, a ropuinate kha, amahah khan a awm lova. A chhunga awm Pathian Thlarauthianghlim leh Kohhran mipuite ah zawk a awm a ni tih ka ngaihtuah thlen chang erawh chuan, ka thaw huai thin.

Kohhran mipuite kan trang tlang ang a, Pathian awmpuinain lungrual takin Biak In thar kan sa zo thuai ang a. Chu Biak In tharah chuan Pathian Thlarau Thianghlim awmpuinain Pathian kan fakho leh dial dial ang a, lungrual takin, hlim takin kan lawiza leh ang a. Tichuan Biak In nuam tak, Kohhran ropui tak chu kan chhawm nung zel ang a. Pathian châka tuihal apiangte thlamuang taka an lawiluh theihna Biak In, Pathian kan hmuh leh pawlna hmun, Biak In nuam tak kan nei leh ngei ang tih ka ring e.

 

Lalbuatsaiha
Dt. 06th June, 2017

Biak In Thutthleng tur zai zawh a ni ta.

Phullen Kohhran chuan Biak In Thutthleng tur thing a zai a, ni 29.04.2017 khan zai zawh a nih tawh thu dawn a ni a. A zaina hmyn Tuivawl kam, Tuizal chhuah bul atangin khuaah hawn theih a ni ta a ni.


 

Phullen Kohhran VBS Naupang inhruipawh

https://youtu.be/_4_CXJzl63Y

KTP Day 2017 PUAL

(KPT pian hmain Phullenah Thalai Pual inkhawm hun siam a ni tawh) – Buata Bawihtlung : 16.2.2017, 8:55 PM

Thuhma:
Kum 1953 November ni 27 khan Teachers’ Training School-ah mi pawimawh tak tak leh hmun hrang hranga zirtirtu a thawk kalkhawm ten Kohhran chhunga Thalai awmte mumal taka insuihkhawm a, Krista rawngbawl kawnga thalaiten an mawhphurhna an hriat chian leh zual theihna a nih beiseiin pawl an din a, Provisional Committee an siam nghal a. Chu chu KTP din tanna bul chu a ni awm e.

KTP Din Ni leh KTP Day:
KTP din Ni tak hi mumal taka chhinchhiah a awm loh avangin Kum 1989 February 23-26 a KTP Conference chuan February 22, 1954 chu KTP din ni leh, KTP Day atan a pawm a. Mahse kum 2015 atang khan, tun hma a Synod Standing Committtee-in KTP din rem a tih ni 16.2.1954 chu KTP Day atan pawm a ni leh ta zawk a ni. Kohhran kut ke pawimawh ber zing a mi, Kohhranin a duh taka a din KTP hi a thangduang hle a, Pathianin a awmpui vang a ni tih pawh a hriat theih awm e.

KTP Thupui leh Sual rawngbawl a inhmeh lo:K

TP hi pawl naran a ni lo va, thupuiah pawh “Rawngbawl tura chhandam” tih ngat hmang a ni a. Heta rawngbawl tih hi Pathian rawngbawl tihna a ni. Chuvangin he pawl (KTP) a tel tan chuan, sual rawngbawl te, that chhiat leh dawngdah taka awm chu a inmil lo hle awm e.

KTP Thiltum leh Dawngdah taka nun a inrem lo:
KTP thil tum 4 te hi a tha khawp mai – 1. Isua Krista Rinna Leh A Mah Anna Kawnga Thalaite Hruai, 2. Kohhran Hnathawh Tih Puitlin, 3. Kohhran Kut Ke Ni Tura Thalaite Buatsaih, 4. Krista Chanchintha Puan Darh. Heng zinga pakhat chauh pawh hi Kohhran tan chuan thlamuanpui awm taka ni a. Heng hi tipuitling tur chuan, sual rawngbawl leh thatchhiat, dawngdah hi a rem lo hle a ni.

KTP pian hmain Phullenah Thalai pual inkhawm hun siam a ni tawh:
KTP din hma khan, tunlai angin Kohhran la mumal lo mahse, Kohhran chu a thang duang tan hle a. Kohhran hruaitute pawh an fir viau bawk a, khawvel zai leh kaihlek hla sakte an phal ngai lo a. Kaihlek hla an uar zualpui a reh deuh hnu kum 1940 lai vel khan Thalaite pawh Kohhranah an tui hle a. KTP chu la ding lo mah se, thalaite chher hriam leh an puala inkhawm hun siam tul tihna a lo awm tan a.

Tichuan August ni 27, 1944 khan Phullen Kohhran Committee chuan Pathianni zan, mipui inkhawm tan hma chu Thalai puala inkhawm hun atan a ruahman sak ta a. Kum khat dawn an kal hnuah Phullen Kohhran Committee chuan April ni 29, 1945 khan Nilai zan inkhawm an lo khaih lak lai mek chu Thalaite inzirna hun atan tiin an thar thawh leh ta a ni. Hetih hun laia Thalai ho inkhawm kaihruaitu langsarte chu – Upa Zulawma te, Pu Kapruma te, Pu Tawnkima (a hnu a Upa nit a) an ni.

Phullenah KTP din a ni:
SYNOD in KTP din tura a tih angin Phullen ah pawh KTP hi Ni 25.9.1954 khan din nghal a ni a. Mumal taka chhinchhiahna hmuh tur a awm lo na a, KTP hruaitu hmasate chu – Upa Thanzuala (T.Upa a nih lai), Upa Lalrema (Upa a nih hma), Pu Rokima, Pu Biakchhunga (Upa a nih hma), Pu Thanthuama (L), Pu S.Rotluanga (L), Zadenga (Upa a nih hma), Pu Chuauthuama (Ztu) te an ni.

Tlangkawmna:
Tichuan, KTP chu lo thang chho zelin, Kohhran kutke ber, Kohhran huang chhunga Thalaite sengluttu, Kohhran hmalaknate a hlawhtlin theihnana theihtawp lo chhuah a, Kohhran tichaktu a nih bakah, a theih ang tawk a Krista chanchin tha puangdarhtu a lo ni ta zel a ni. Hetiang pawl tha leh ropui, zahawm tak kan nei hi Kohhran hote kan nihlawh tak zet a, KPT a telte phei chu kan vannei lehzual hle a ni. KTP vul zel rawh se.

KTP Day 2017 Chibai vek u.

Thlalak hlu zual thenkhat

Heng thlalakte hi Krismas leh Kumthar vuak veta a remchan ang anga ka laksakte an ni. Decoration Committee erawh hi chu ka Camera a lak ni tho mahse, ka hmeh a ni lo. Heng thlalakte hi, kum tam a liam leh hma hauh pawhin, a hlu ka ti em em a ni.