Category Archives: Kohhran Chanchin

PHULLEN PRESBYTERIAN KOHHRAN LO PIAN DAN

Phullen Kohhran hi khandaih khua leh Kohhran kal zel kha a ni a. Tun hmain khaw hmun hi an sawn kual thin a, mumal taka ziaka thil vawn thatte a la ni lo a, an awmna hmun hming kha an pu zel mai thin a. Khandaih khua a lo indin tan ni mahse, Phullen a an insawn hnuah Phullen tih a ni a, Kohhran hming pawh Phullen Kohhran tih a ni ta a ni.

Khandaih khuaah hian August ni 1, 1903 khan Zosap Missionary te leh Bawrhsap ten Khandaih lal Vanphunga remtihnain Sikul nghet an din a. Hei hi Mizoram thingtlang Sikul hmasa ber a ni a. Zosap Missionary ten an hnena lehkha zira awm, Khawnbawl Upa fapa  Hrangsaipuia (Hranga), Kristian tlangval chu Zirtirtu hmasa ber ni turin Khandaih ah hian an tir haw a. Sikulah chuan Pathian thu te a sawiin a zirtir thin a. Tichuan Sikul chu Biak In atan  hman a ni ve nghal a. Pathian thu awih a inpe te awm nghalin Phullen Kohhran (Khandaih Kohhran) chu a lo piang ta a ni.

Khandaih ah hian ringtu hmasa Khuma leh Duma te pawh kalin “Pathian thu lo awih ve tawh rawh u” tiin Pathian thu hrilin khua chu an fang a. Pathian thu awih thar an awm zel a, chung zingah chuan Mizo Kristian Martar hmasa ber Tv Chalbuanga Chhangte pawh kha a tel ve a ni. Khatih lai khan Kristiante khan Isua lama tang an in ti thin a ni awm e. Pathianthu awih an pun ve zel takah chuan Zosaphluia (Rev. DE Jones) leh ringtu hmasate chu November ni 2, 1904 khan Khandaih ah hian kalin, zanah Mualveng Zawlbukah Khandaih Kohhrana ringtu hmasate chu Baptisma a chan tir a. Hei hi Phullen (Khandaih) Kohhran a Baptisma chantir hmasak ber ni a hriat a ni. He Baptisma chantirnaah hian Zirtirtu Hrangan hming a lam a, Tirhkoh Vanchhungan Fenthlirin tui a lo keng bawk a, Pathianthu awih engngemaw zatin Baptisma an chang a ni.

Kum 1905 December ni 3 ah Khandaih khuaah Hripui rapthlak tak a leng thut mai a. Chu hripui chu Pathianthu awihho vanga lo thlengah an ngai leh nghal a, Kohhranho ten lal leh upate huat an hlawh zual phah hle a ni. Kum 1906 April ni 8 ah Tuivaia Sangha an tlangvuak naah mak tak main Thlarau thianghlim Harhna a lo thleng nawlh mai a. Hnuneka Pawite atanga intanin, khawtlang a fanchhuak chiang hle a. Pu Neihruma chuan hla chang a sawi a, kut beng leh ban pharin, hlim takin an lam kual thin a ni. Hetianga mak tak mai a hlim taka zai leh lam bakah, kut beng leh ban phar a lam kual ang chi hi Mizoramah a la thleng ngai lo. Khandaih ah April ni 8, 1906 Pathianni in a thleng a, mak tak mai bawkin Aizawl ah April ni 9, 1906 Thawhtanni ah a thleng ve leh chiah a ni.

Pathian thu awih an lo pun ve zel avangin an khawtlang nun chu rawn tichhe vek dawnin an hria a, lal leh upate chuan an ngaithei lo zual a. Kristiante tirem turin kut te an inthlak a, kum 1906 May thla atangin Kristian tihduhdahna chu a hluar zual ta a. Kohhran mipui ten hrehawm nasa tak an tuar a, khaw dangahte an pem hial a. Khandaih tlangval fel Chalbuanga Chhangte pawh kum 1906 khan tihduhdahna vangin a thi a,  Mizo zinga Kristian Martar hmasa ber a nit a nghe nghe a ni.

Lal leh upa ten Changzawl kai an rel a, kum 1906 Pawltlakah Kawnpuiah Bawk an khawh a. Hetah pawh hian tihduhdahna a hluar zual sauh nghe nghe a, mahse Kohhran mite chu an dinnaah an nghet zual ve zel a. Kum 1907 a Kawnpui atanga Changzawl an kai leh dawn hian, Kristianho chu kai ve an phal lo a, a hnuah Bawrhsap a inrawlh tak avangin an phal sak ve leh ta chauh a ni. Kawnpui an awm lai hian Saithuama hovin Biak In an sa a. Hei hi Sikul ring lova a hranga Biak In an neih hmasak ber a ni.

Changzawl atangin kum 1910/11 ah Thanglailungah an insawn leh a, kum 1911 ah Vanphunga fapa Awksarala chu lal a ni ve ta a. Kristian tihduhdahna a reh tawh a, Kohhran pawh a lo mumal ve a deuh a. Thanglailungah hian kum 1913 khan Phullen Kohhran a a vawi khat nan Kohhran Upa an thlanga, chuta an thlante chu – Ralkaikima, Tuaha, Kuaia, Zokunga te thlan an ni a. Hemi kum hian Ralkaikima, Tuaha, Kuaia te hi Aizawl presbytery in a nemnghet a ni. Thanglailung awm lai hian Sanday Sikul pawh neih tan a ni bawk.

Kum 1914 ah Thirhlumah an kai leh a, heath hian Kristiante erawh tlemte chauh an kai a, a tam zawk chu Phullen lamah an kai thung a. Thirhlum awm lai hian lal Awksarala khan piantharna a chang nghe nghe a. Zawlbuk khuangte chu Biak Inah la lutin hlim takin an zai a ni. Thirhlum a awmte leh Phullen a awmte chu 1916 velah Changzawl Kawnpui ah an kai nawn leh a. Kum 1926 ah Changzawl Kawnpui atangin Phullen ah an kai leh ta a ni. Hetianga an insawn kualna ah hian Kohhran chu nghet takin a ding zel a, Biak In pawh a hrangin an sa thei zel bawk a ni. Phullen kai 1927 hian hmunhlui veng leh lailak inkar kawn zawl nuam laiah Biak In tha tak sak a ni a. Kan lal Awksarala khan Kohhran Pulpit tur tha tak a siam bawk a.

Kum 1949 ah khan Biak In hi a thar a sak that leh a ni a, kum 1952 ah sak zawh ni. Mahse Biak In chu Mizoram buai 1966 khan Vai sipai ten an hal chhe vek a, bungrua tam tak a kang nghe nghe a. Tichuan Biak In chu April ni 2, 1967 ah hmun hran, Kulhkawn leh Pengthuamthum inkar tlang zawlah Paihte vengtlangah sak tan leh a ni a. Kum engemaw zat hnuah hmun thar lamah mi an insuan hret hret a, Biak In pawh chu April 9, 1991 khan thiant tanin, Hmunthar (Vengthar) lam Sub Centre awmnaah sawn a ni a. July 26, 1991 khan Biak In thar  chu luah a ni ta a. He hmunah hian Kohhran chu nung takin tun thlengin a awm zui ta a ni.

 

(Ziaktu : Buata Bawihtlung)

Advertisements

MARTAR CHALBUANGA CHHANGTE, KHANDAIH – MIZO ZINGA KRISTIAN MARTAR HMASA BER

Martar Chalbuanga lungdawhLalbuatsaiha (Buata Bawihtlung)
Buata.tkt@gmail.com
Dt. 05.07.2018 @ Azl

Mizo zinga Kristian Martar hmasa ber chu Khandaih khaw tlangval fel leh taima Tv Chalbuanga Chhangte a ni a. Chalbuanga hi kum 1882 khan lo piangin, unau mipa awmchhun niin an unau a upa lam atanga pathumna a ni a. A Pa chu Thilluta a ni a, a Nu chu Famthangi a ni a. A pa hi a thi hma a, a nu hoin an awm thin a. An unau chu hengte hi an ni-

  1. Tlangziki
  2. Chawntuahthangi
  3. Chalbuanga
  4. Khuallutthangi
  5. Chawngnghilhlovi
  6. Tlangchawiveli

Chalbuanga te khua Khandaih hi Mizoram hmar lamah awmin, Pawihbawiha fapa Vanphunga Sailo khua a ni a. Khaw taima tak, Buh leh bala a intodelh leh khaw nuam tak niin Zawlbuk pawh pahnih an nei a. Kha tih lai a Mizoram khaw lian ber niin, In 700 khua an in chhal a. Rev Liangkhaia ziah dan erawh chuan In 550 niin Mizoram khaw lian ber a ni a, Biate in a dawt a ni awm e.

Khandaih khuaah hian kum 1903 August ni 1 khan lal Vanphunga remtihnain Zosap Missionary te leh Bawrhsap ten Mizoram a Thingtlang Sikul nghet hmasa ber an din a. Zirtirtu chu Khawnbawl Upa Vawma fapa Hrangsaipuia a ni. Sikul kha Pathian thu sawi nan leh zirtir nan hmangin Biak In ah hman a ni ve nghal a, Kohhran a lo piang ta a. Khandaih ah hian ringtu hmasa Khuma leh Duma te chu Pathian thu hril a kalin “Pathian thu lo awih ve tawh rawh u” an ti a. Pathian thu awih an lo awm ve ta a, Tv Chalbuanga pawh Kristian hmasa zingah hian a tel ve a. Khatih lai khan Kristiante khan Isua lama tang an in ti thin a ni.

Tv Chalbuanga hian kum Kum 1904 November ni 2, Nilaini zan khan Mualveng Zawlbukah Zosaphluia (Rev DE Jones) kut atangin Baptisma a chang a. Zosaphluia hi Pathian thuawih hmasate Baptisma a chan tir turin Khandaih ah hian ringtu hmasa te nen Aizawl atangin an kal a. He Baptisma chantirnaah hian Zirtirtu Hrangsaipuian Hming a lam a, Tirhkoh Vanchhungan Fenthlirin tui a lo keng bawk a, Ringtu engngemaw zatin Baptisma an chang a ni.

Chalbuanga hi Khandaih khaw tlangval taima, tlawmngai leh huaisen a ni a. Lal Vanphunga pawhin Khawnbawl Upa atan a sawm hial a. Khawngbawl upa dinhmun hi thil namai lo tak a ni a, mahse Kristianna kha bansan a ngai dawn si a. Chuvang chuan Chalbuanga hian lal sawmna duhawm tak chu hnarin Isua lam tang nih a tlang ta zawk a ni.

Kum 1905 kum tawp lamah Chalbuanga te khua Khandaihah hian Tuihri a leng thut mai a. Kum 1905 December ni 3, khan khawnbawl upa pakhat chu Lal ina Zu an in laiin a kua a khawh a, chumi ni la la chuan a thi zui ta mai a. He hripui vang hian Puitling pawh mi 50 chuang zet an thi hman a, an inphum seng lo thelh a ni an ti. He hripui hi Pathian thu awih hovin Ramhuai lal Sahmula an tihthinrim vanga lo thlengah an ngai tlat a. Sorkar mi tirh compounder in Tuihri damdawi Tuikhura a phul te pawh chu, an mahni tih hlumna tura Kristiante tihah an ngai zel a. Kristiante chu an haw zual hle a ni awm e.

Kum 1906 April ni 8 Pathianni ah chuan, Chalbuangate khuain Tuivaia Sangha an tlangvuak naah Harhna a lo thleng a. Pathian thuawihte chu zai pah a kutbengin an lamkual a, midang a kai chhawng zel a. Hei hi mipui vantlang hmuh leh hriat theih a Mizorama harhna hmasa ber a ni a. Mak deuh chu Khandaih a harhna a thlen tuk April ni 9, 1906 Thawhtanni ah Aizawl ah Harhna a lo thleng ve chiah a ni.

Harhna a lo thleng a, Pathianthu awih an pung ta hluai mai bawk si. Pathian thu awih ten Chawlhni serh a, hna an thawk lo chu Lal leh upate chuan an ngaithiam lo hle a. Nitin kawla nichhuak chhiara fehchhuah pawhin hawp khawp thar a har the lul nen, engtin nge Kham an thar ang le? tiin Kristiante chu tam hmahruai an ni e tiin an duh lo hle a. Kristianna chuan an khawtlang nun tichhe vek torah an ngai a, tih rem dan a ngaihtuah ta a.

Lal chuan a upate chu, an chhung leh khat  zinga Isua lama tang (Kristian) an awm chuan, Zu inkhawmnaah Zu no a pek kan ta zel mai a. Chu chu Upate chuan hrehawm an tiin, an fate chu Pathian thuawih bansan turin an thlem a, an vau a, kut hial an inthlak ta a. May 1906 vel atang chuan Tihduhdahna chu a hluar tan a. Khawnbawl upa fate chauh ni lo, Pathian thuawih tawhphawtte chu Kristianna bansan turin an ti a, hmuhsitna leh ensan bakah khua atanga hnawhchhuahte leh ti duhdah nasa tak an tuar a.

Hetiang a ni chung hian Kristiante pawh an rinnaah an nghet em em mai a. Pathianthu awih lo lam pawh an vung em em a, Pathianthu awih an sawisak zinga pakhat chu, a thi ni a ngaiin dai ah an kalsan a. Chalbuanga chuan a khawngaih hle a, a ruang chu va hlawm a tum a, mahse vanneih thlak takin a lo thi lo hlauh a. Chu tlangval chuan “Buanga ka tui a hal lutuk, tui min pet eh” a ti a. Chalbuanga chuan tui intur pein a baiwhsawm a, inah a hruai haw ta a.

Chu chu Pathian thu awih lo ten an lo hriatin an thin a rim hle a, hun remchang an hmuh veleh Chalbuanga chu an sawisa ve ta a. Pathian thusawih chu a bansan duh chuang lo a. Tuthlawh ha suih loh in an vua a, a hnung zang chu an vaw kak hial a. Pa nei tawh lo leh fapa mal a nih bawk avangin Lo lamah mipa hna a farnu ten an thawk chu a ngaingam lo a. Na chung chungin a feh ve a, Thlam saknaah te a farnute a lo kawhhmuh thin a.

A na chu a tui hluam hluam a, a Nuin In lama lo awm hahdam tura a tih pawhin, “Isua lamtang tan a na lo ve” a ti mai thin a ni awm e. Tuk khat chu, a hliam tui hluam hluam chu a lo hil duak mai a, a dam tawh dawn ni a ngaiin an lawm hle a. A chhungte pawh chuan ngaihtha takin an fehsan a. Mahse, a nu leh farnute feh an lo haw chuan a lo na zual hle a. A chhungte hnenah chuan “khi min hruaitu tur an lo thleng ta, ka kalsan tawh ang che u” a ti a. Tichuan Pathianthu awihlote kutthlakna avang chuan, kum 1906 khan Khandaih tlangval fel Chalbuanga Chhangte chu kum 25 mi niin a Martar ta a. Mizo Kristian Martar hmasa ber a lo ni ta a ni.

Vanphunga khua Khandaih chu kum 1906 pawltlakah lal leh upaten hma hruaiin Changzawl Kawnpuiah an kai a. Kristian tihduhdahna chu a hma aiin hluar zel a.  Kawnpui chu a hrisel lo a, 1907 ah Changzawlah an kai leh a. Hetah hian Kristiante chu kai ve an phal lo a. Kristian te chu Bawrhsap hnenah an zual ko a. Kristian tihduhdahna a thawh hlawk tak thin piang thar ta Saithuama ho chuan Kristiante chu Kawnpuiah chuan an awm a. Biak In pawh, Sikul tawmpui lovin, 1907 khan a hrangin an sa ve ta nghe nghe a. Mahse, Bawrhsapte nawrna vangin Kristiante chu Changzawl kai an remti leh ta a.

Chalbuanga hi a dam laiin, a chhung ten a nupui tur Pathian thu awih nula an lo be hmin vek tawh a. Inneih hun tur nghaka an awm mek laiin, tihduhdahna a tuar ta a. An sawisakna avanga a hliam te chu na hle mah se, Isua phatsan a duh ngai lo a. A chhungten Kristian a nih vanga sawisak a tuar chu an manganpui em em a. Mahse ani chuan Thlarauthianghlimin a awmpui tlat a, “Lalpan, rethei leh manganga kan awm reng hi a phal hauh lo ang, nakinah chhim chhaklam atangin Khuallutthangi (Mambawihi) hian inleng a nei ang a, chu chu in lo neih tir dawn nia” tiin a chhungte chu a hrilh nghe nghe a ni awm e. Tichuan, Tv Chalbuanga khan a Nupui tura an biak fel vek tawh chu a thihsan bawk a ni.

An innghahna ber, mipa awm chhun Chalbuanga a thih takah chuan, a chhungte chu an khawhar zual hle a. Nakinah chuan Hmunhmeltha atangin Pathianthu awih hmasa ber Chawnghnuna chuan Khuallutthangi chu nupui atan a rawn rim ta a. A chhungte chuan an inneih tir ta a. Hmunhmeltha ah hian Khandaih tihduhdahna avanga pem lut an awm hlawm a, Rev Zairema pa Pu Doliana te, Tekrawiha (Upa) te, Suakdaia te, Chaleka te, Rualkhuma te, Famthangi te leh Chhuanbuanga te an ni. Martar Chalbuangan a lo sawi lawk tawh chu a takin a lo thleng ta a lo ni reng mai a. Chawnghnuna te hi sa la thei tak, khawsa thei tak an ni a. Nupui a neih hnu hian lehkha te zirin Khawchhiar ah a tang nghe nghe a ni.

Vanphunga khua ah chuan Kristiante tihduhdahna chu a la hluar sauh sauh a. Tichuan Martar Chalbuanga nu Famthangi te chuan, an makpa Chawnghnuna te awmna lam, Hmunhmeltha khua ah chuan pem an tum ta a. Zanah bungrua nen, a ruk thei ang berin an chhuak a. Hmunhmeltha an panna kawngah hian, an hma lawkah Keipui a kal zel a. Chutia Sakeiin an hma a hruai chu, Famthangi chuan, “Pathianin min hruai turin a rawn tir a niang” tiin, thlamuang takin an kal theih phah a ni awm e.

Khandaih lal Vanphunga leh a hoten Kristiante an tihduhdah hi, tun hnua ngaihtuahin an demawm viau a ni mai thei a, mahse khatih hun lai ngaihtuah kha chuan an dem awm lem lo ve bawk. Kristianna a lo luh khan, Fathang te an chhung lo a, Chawlhni ah hnathawk lovin an serh bawk a, lal thu aia ngaihpawimawh an nei ta bawk si. Kristianna khan Mizo khawtlang nun kha a rawn sawi danglam dawrh a, Kristianna chuan an nun kha a rawn ti chhia ah an ngai a ni.

Thlirna dang atanga thlir chuan, Khandaih lal Vanphungan khatiang taka Mizo sakhua leh culture vawnghim tura theihtawp a lo chhuah kha a chhuanawm tak zet zet zawk a ni. Kha tihduhdahna avanga Kristian pem chuak ten khaw dangah Kristianna an pu darh zel te kha Pathian rem ruat zawk a nih a rinawm hle a. Vanphunga kha Pathianin hmanruaah a hmang mai zawk a ni. A hnuah Vanphunga pawhin Piantharna duhawm tak a chang zui ve leh ta nghe nghe a, a hovin Krismas te an hmang a, Kristiante thlamuantu a ni zui ta zawk a ni.

Khawkhat tlangval fel leh tlawmngai Chalbuanga, a pa thih hnua an chhungkaw innghahna, mipa awmchhun chu Krista vanga tuarin Martar mahse, a chhungte leh an thlahte chu Pathianin a awmpui zel a. Pathian leh a Kohhran tan mi tinawm tak tak an ni zui ta zel a ni. Khandaih Kohhran kal zel, tuna Phullen Kohhran ni ta chuan Biak In tualah Martar Chalbuanga pual hian Lungdawh mawi tak “MARTAR CHALBUANGA LUNGDAWH”  an siam nghe nghe a ni.

Biak In chung chih ṭan a ni ta

Presbyterian Phullen Kohhran vhuan Pathian hruaina zarah Biak In sak hna chu tluang takin a, kalpui zel a. Tunah hian Biak In chung chih hna thawh mek a ni a. Kohhran mipuite kan phur tlang hle a. Kan kohhrana lawi ni lem lote pawhin Biak Insak hi min phurpui hle a, Kohhran hnatlangahte an rawn thawk chhuak ṭhin a ni. Hetianga Pathian Kohhran tana inpe ṭhinte hi kan pa Pathian van ami chuan a lawm hle ang toh a rinawm.

UPA LALREMA PIANCHAM PHA PUALIN A – CHANCHIN TLEM

IMG_20180328_224152

HAPPY BIRTHDAY – UPA LALREMA

28th March

Vawiin March ni 28 hi Phullen pa lar Upa Lalrema pianchampha a ni a. Amah hi ka ngaisangin ka ngaihlu hle a, a chanchin ka hriat ang angte hi in lo chhiar ve atan ka rawn dah chhuak ve e.

 

Upa Lalrema hi March 28, 1928 Wednesday, Leap year kum khan Phullen ah a lo piang a. A pa chu Phullen Kohhran Upa hmasa ber zing a mi Upa Ralkaikima a ni a, a nu chu Pi Bawihchhungi a ni. Phullen kai kha 1926 a ni a, Phullen a piang hmasa pawl zing a mi a ni. An unau chu hengte hi an ni –

  1. Upa Lalrema H/o Thanzami (L)
  2. Saihnuna (L) H/o Lalbuangi
  3. Upa R. Laltluanga (L) H/o Lamkungi
  4. Ramthangi W/o Upa Ramzauva
  5. Ngurzami (L) W/o Upa K. Lalrova (L)
  6. Saithangliana (L) H/o Vanlalhumi Pachuau
  7. Ralkapsanga H/o Lalbiaknungi

Upa Lalrema hi lehkhathiam, hmanlai pawl 3 pass a ni. A naupan laiin Zirtirtu Hanga Sikul Phullen ah a kal thin a. Pawl 3 hi a kum khatnaah a hlawh chham a, a beihnawnnaah erawh a thiam hle a, tha takin kum 1939 khan a pass ta a. Khatihlai khan Phullen a zir theih chin chu Pawl 3 a ni a. Fa u a ni bawk nen Pawl 4 a zir chhun zawm thei ta lo a. Mahse, thiamna thuk zawk leh zau zawk nei turin kum 1940 khan Kelzam khua a zirtirtu thiam tak Pu Biakthuama hnenah a nu leh pa ten an kal tir a. Pu Biakthuama hnenah hian English leh Mathematics a zir deuh ber a.  Sorkar lehkha Petition, saptawng un tak takte hi chipchiar takin letchhuak diak diak thei vek lo mahse, a tlangpui chu a hre vek thin a ni.

Upa Lalrema hi Kristian chhungkua, ringtu hmasa leh kohhran hruaitu pawimawh atanga piang leh seilian niin, a pa Ralkaikima kha Khandaih Vanphunga khaw kal zel, tun hnua Phullen Kohhran ni ta a Kohhran Upa hmasa ber a ni. Hetiang a nih vang hian Pathian leh a kohhran ngaipawimawh mi, Kohhran tana theih tawka thawk thin a ni. Kum 1946 February ni 22 (Zirtawpni) khan Pi Thanzami nen inneiin Pathian malsawmna fa mi pa 4 leh hmeichhia 3 an nei a, kohhran leh khawtlangah pawh mi puitling tak tak an ni hlawm.

A pa hnung zuiin, Mizoram buai vanglai, kum 1968 khan Upa Lalrema hi Phullen Kohhran Upa ni turin thlan a ni a. Kum 1968 ah vek hian Suangpuilawn Kohhran Biak Inah Hmarphei Presbytery in Kohhran Upa atan a nemnghet nghal a ni. Tualchhung Kohhran ah nihna pawimawh hrang hrang a chelh bakah, Pastor Bial Chairman te, Bial Secretary hna te leh Presbytery Moderator hial te a lo chelh tawh a, Mizoram Synod ah, committee pawimawh tak- Music committee te, Pastoral Committee ah te member a lo ni tawh thin bawk a ni.

 

Upa Lalrema sawi hi chuan, amah mai hi duh tawk a har a, a pa Upa Ralkaikima, Vanphunga khua Khandaih Kohhran kal zel, a hnua Phullen Kohhran lo ni ta a Kohhran Upa hmasa ber chanchin hi sawi tel a chakawm thin.

Kan hriat angin, Upa Lalrema pa Upa Ralkaikima kha ringtu hmasa, kohhran hruaitu, Upa a ni a. A pa chu Rokanga a ni a, a nu chu Zaphung huaisena farnu Saihnuaii a ni. Upa Lalrema nu te hi kan lal Pu Awksarala te nen inhnai tak an ni a, Pu Awksarala khan puanthui te a thiam tir a ni.

Kum 1906 vela Pathian thu awih (Kristian) te tihduhdahna chuan zual lam a pan hle a. He tihduhdahna ah hian khawnbawl upa, fing leh thunei em em Darkhuma fapa Saithuama chu a phusa ber zingah a tang a. Saithuama hi lal upa fa a nih baka, a pa lianin a chak hle a, mi ten an zahin an hlau hle a. Tihduhdahna kawngah phei chuan lal ai pawhin an hlau zawk hial a. Hetihlai tihduhdahna vang hian Tv Chalbuanga pawh pawh Martar hmasa ber niin a thih phah hial nghe nghe a. Heta Darkhuma hi tuna PHC tlang ni ta hming hmasa “Darkhuma veng tlang” hming put chhan a ni.  

Ni khat chu, Ralkaikima (Upa nit a) nu Pi Saihnuaii (Upa Lalrema pi) chu chhuat laiah thu thluangin a fapa tleirawh uaih tawh Ralkaikima (Upa) chu a mal a lukham tir a, a lu keivin a hrik a en sak a. Chutih lai tak chuan khawnbawl upa fapa Saithuama, Kristian ten an hlauh em em mai chu an inah chuan a dak lut hlawl mai a. Kristianhote an tiduhdah nasa si a, Kristian an nih avangin Saithuama chuan a rawn nghaisa dawn a nih an ring nghal mai a. Saithuama chuan, “Saitual ah kuli a kal tur a ni a, chuta kal tur chu i ni e. A kal ni tur chu Pathianni a ni ang. Pathianni a kal i duh loh chuan, Inrinni ah nangmahin lo zuk inchhawp rawh”  tiin tleirawl Kaikima chu a rawn hrilh ta mai a.  

Kuli kal ni atan Pathian ni an thlang kher kher hi Kristian a nih vanga tihduhdahna chikhat a ni a. Pathian thu awih Ralkaikima chuan Pathianni chu serh a, inkhawm a duh ngei dawn tih hriain chumi tibuai tur chuan Pathianni a kal turin an ti a ni a. Tleirawl ve uaih tawh mah ni se, mahni a Kuli a kal hmasak chu a huphurh hle a, mahse  Pathianni serh loh a duh si lo, tichuan ram hnuai sa hlauhawm karah hlau chung chungiin amah chuan a kal ta a.

Tunlai angin kawng mumal a la awm si lo. Khandaih atanga Saitual kal chu a namai lo hle a. Thanglailung kaltlangin, Arthladawn mualah kawng sah pawp mumal lo tak, kal harsa tak zawhin Chhirdem ah, chuta tangkin Darkhuang mual an liam a, Tuivawl an kan a. Tuivawl atangin ram vah kawngah Sihfa a pan leh a. Sakei hnu, lian deuh leh te deuhte, hnu hlui deuh leh hnu thar deuh te a bak chuk mai a. Tleirawl mai a la ni bawk si a, a hlau em em mai a. Hlau chung chungin Saitual ah chuan a in dah fel thei ta a. Vanneih asiamin engmah tibuaitu a tawk lo hlauh bawk a. Tluang takin a haw ve leh thei ta hlauh a. Chutiang chuan Pathianni serh duh vangin hrehawm nasa tak a lo tuar tawh a ni.  

Nakinah chuan, Kristiante tiduhdahtu Saithuama bawk chuan ring leh fiah takin “Ralkaikim” tiin a hmin pumin, pawn atang chuan a ko lung lung a.  Pathianni a serh loh phah nan Kuli turin an tir a, mahse, an rin loh deuhin a hma niin a lo dah fel der mai si a. An Kristian ruh hle tih a lang reng si a, chuvangin a rawn nghaisa tawh ngei dawn a nih ringin a lo hlauthawng hle mai a.  Saithuama chuan, Pathian thu I la awih ta reng em?” a rawn ti a. A zawttu chu a pa lianin a chak si, engtin nge a tih ang aw?  Pathian thu a Awih zel thu a hrilh chuan, nasa takin a nghaisa ang tih chu a rinlawk theih a. “Awih reng lo e” a tih chuan Isua a phatsan a ni dawn si. A ngawi vang vang a, a hnu deuhah chuan “Awih e”  tiin a chhang ta a.  Chutah le! Rin loh takin Saithuama chuan, “Lo awih reng rawh u, kei pawh ka la rawn awih duh ve mai thei a ni” a ti a, a kal ta daih mai a! A thinrim hle dawn emaw tih laia, rin loh tak mai a chhan avang chuan Kaikima chu a lawm em em a, a thawveng huai a. Hlau chung chunga Pathian a phatsan lo chu a hlim phah hle a ni.

Pathianthu awihte tihduhdahna hi Kawnpui, Changzawl an insawn hnuah pawh a hluar zual hle a. Mahse Kristiante pawh rinnaah an nghet sauh emaw tih tur a ni a. Kawnpuiah hian kum 1907 khan a hrangin Biak In an sa ta nghe nghe a. Upa Ralkaikima chu Kohhranah inhmang zelin a hruaitu pawimawh zingah a tel a. Changzawl awm lai kum 1907 a  lal Vanphunga leh Zosapte an inhmuh thiam loh khan, lal Vanphunga khan, a fapa Lalbuaia Sailo (Luangpawn lal ni ta) leh Pu Ralkaikima (Upa Lalrema pa) leh Pu Vawma (Khawnbawl upa, Ztr Hranga pa) te chu Aizawl ah Bawrhsap dawr turin a tir zui a. Vanphungan Pathianthu awihte tihduhdah a bansan loh chuan, a lalna ban tir a nih tur thu Bawrhsapin a lo sawi thin chu, mi ten Vanphunga lamkalte hi an hrilh ngam lo a. Mahse Upa Ralkaikima teho hi chuan zep lovin an hrilh ta vek a, Kristiante tihduhdahna pawh a ziaawm phah ta a ni awm e.

Kum 1910 ah Thanglailungah an insawn leh a, lal Awksarala chu lal a ni zui a. Thanglailung awm atang hian Kristiante tihduhdahna a lo reh ta a. Krismas te pawh ruai nen an hmang tan a. Kohhran pawh lo changtlung sawt hle a. Kum 1913 ah Kohhran Upa thlan a ni ta a. Aizawl atangin ringtu hmasa Pu Thanga ten an inthlanpui a. Ralkaikima, Kuaia, Zokung leh Tuaha te an thlang a. Ralkaikima, Kuaiate, Tuahate hi, hemi kum vek hian Aizawl Presbytery chuan Kohhran Upa atan a nemnghet zui nghal a. Tichuan Khandaih Kohhran kal zel, tuna Phullen Kohhran nita a Upa hmasa ber an lo ni ta a ni.

    Upa Lalrema chanchinah let leh tai la. Upa Lalrema hi pa kawm nuam tak, ti ti thiam tak, fiamthu duh bawk si a ni a, a kianga awm chuan nuih inpeih reng a ngai thin a. Fiamthu duh leh hlim thei tak a nihna hi kum 89 a nih tawh pawh khan a la nunpui reng a. Tawngkam bungrua tha tak tak a nei a, Kohhran ah hnatlang tura Kohhran mipuite fuih phur pawh a thiam hle thin. A fiamthu leh a titite hi lakkhawm a, dah that tham a neiin ka hre thin. Kar kalta maia chatuanram min pansan ta Pi Vanlalawii pawh khan, kum 97 a nih tawh khan, Upa Rema titi sawi chhawngin a la nui bawk bawk nia.

Upa Lalrema mizia tilang chiang em em tu, a chanchin ka hriat pakhat chu, hman kum tawh khan Diakkawna dawrkai pakhat chuan, “Upa Rema hi dawrah lo dak lutin, ‘hei, kan tuteho hi, naupang an la ni a, in dawrah hmawmsawm leina ba te an lo nei mial lo maw?’ tiin a kal pahin Ba an neih leh neih loh a rawn zawt leh zauh thin” a ti. Pastor induction service a Pastor a fuihna tawngkam ka la hriat reng pakhat “Kohhran zamna ngul rinawm tak nih tum ang che” a tih hi amah hian a takin a nunpui a ni.  

Pa kawm nuam leh titi thiam, fiamthu duh tak, mite tihhlim thiam tak, Phullen Kohhran Upa hmasa ber fapa Upa Lalrema hi, vawiin 28.3.2018 a a pianchampha lo thlenga, kum 90 lai a lo ni ta hi, thinlung takin ka lawmpui a. A hriselna te lo tha zel se, Pathian zarah kum 100 chuang dam ngei turin PIAN CHAMPHA PUAL DUHSAKNA CHIBAI KA BUK E.

Hengte hi ka hriat dana ziak ka ni a, a dik tawk lo palh mai thei, a dik lo lai a awm chuan, a dik zawk kan inhrilh dawn nia – Buata Bawihtlung

 

******************************

Phullen Pastor Bial Pastor Quarters thar hawn a ni ta

Vawiin September 3, 2017 (Sunday) chawhnu Inkhawm ban hnu,  Dar 3:30pm khan, Phullen Pastor Bial Pastor Quarters, Phullen Farkawn veng a sak chu Pathian hnenah hlanna hun hman a ni.

IMG-20170902-WA0015

He hun hi Bialtu Pastor Rev Lalngaihawma Bial Chairman chuan a kaihruai a. Upa T.Lalchhuanvawra Bial Secretary Sr chuan Pastor Quarters sak a nih dan Report a pe a.

Rev. PC. Pachhunga Synod Executive Secretary chian Pathian hnenah hlanin, hlanna thu a sawi nghal a. Bial chhung kohhran mipuite hnenah, Pastor Quarter tha thak an sak theih avangin lawmthu a sawi bawk a ni.

Phullen Kohhran Biak In Thlahna Inkhawm

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang vuain hla an hruai a. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

 

PHULLEN PRESBYTERIAN KOHHRAN BIAK IN THIAH A NI TA

Phullen Presbyterian Kohhran chuan  hun rei tak an lo hman tawh Biak In pui chu Ni 30th May 2017 Thawhlehni khan ṭhiah  ṭan a ni ta a. Kha leh chen hlim tak leh nuam ti taka Pathian biak nana lo hman tawh hetia han thiah tak mai chu, hmasawnna tur leh Biak In thar neihna tur mah nise, a lunglen thlakin, hnuk a ulh ve lek lek thei nia.

Phullen Kohhran Biak In thiah5

Ni 29th May, 2017 Thawhțan zan khan Biak In ṭhiah tur thlahna inkhawm neih a ni a. He inkhawmah hi Bialtu Pastor Rev Lalngaihawma chuan a kaihruai a. Kohhran Secretary Upa Lallawmsangan Biak In thiah tur chanchin leh a sak dante, a saklaia sum senral zatte Kohhran mipuite hnenah a chhiar chhuak a. Kohhran aiawhin Upa Lalrinzauva chuan Biak In thlahna thuchah tawi a sawi a. Kohhran mipui a duh apiang tan thusawina hun hawn a ni bawk. Pu Zoramnuara leh Pu PB Lungmuana te chuan khuang an vua a, Keyboard Tv. H.Lallawmkiman a tum a, Pu Malsawmdawngzela (Lalmama) chuan Aurinna (Mike) a chang a, anni ho chuan zai an hruai a ni. Ban hla bikah hian Pu David Lalrinawma chuan Aurinna (Mike) a chang ve thung a ni. Kohhran zaipawl leh Kohhran Pavalai pawl ten thiam takin Biak In thlahna hla an rem a ni.

Phullen Kohhran Biak In thiah

He Biak In thlahna inkhawmah hian kohhran mipui an inkhawm tha hle a. Biak In a leng lo khawpin Kohhran mipui an inkhawm a. Inkhawm ban veleh Biak In thlahna Thingpui ruai inho a ni bawk a. Chumi hnuah Biak In thlahna pual Kohhran Lengkhawm chu Pavalai pawl huaihawtin neih zui a ni bawk a. Kohhran mipui thahnem tak an lengkhawm a ni.

Ni 30th May, 2017 Thawhlehni hian Kohhran pum huapin Biak In ṭhiah chu ṭan a ni a. A tirah Kawngkhar leh Tukverh frame te lak thlak hmasak a ni a. Chumi hnuah a chung rangva thiah chhun zawm leh phawt a ni a, tichuan a dang pawh ṭhiah zui zel a ni. Hemi ni hian a chung leh a bangte leh ceiling te thiah vek hman a ni. He Kohhran hnatlang ah hian Phullen khawchhunga Kohhran dang atangtein hnatlang a thawkchhuak mi engemaw zat an awm a, Phullen Kohhran mipuite an lawm tak zet zet a ni. He hnatlang chawchhun hmeh tur hi Kohhran Pavalai pawl ten an tum a, Vawksa tui tak an hmeh a. Hemi ni hian Kohhran mipui mi 200 vel zet an hnatlang a, kan Kohhran Upa min Upa Lalrema pawh chak vak tawh lo hle chungin a thawkchhuak thei a, Kohhran choka lamah a lo hnatlang ve a ni.

Ni 1st June, 2017 Ningani hian JPC General Body meeting Kohhran Hall ah neih a nih avangin Biak In thiah hnatlang hi chawlh lailawk a ni a. A bakah chuan ni 31st May 2017 Nilaini atangin Kohhran hnatlang neih chhun zawm zel a ni a. Ni 5th June, 2017 Thawhtanni hian hnathawh tur bik in ruat inruatin hnatlang neih leh a ni bawk.

He kan Biak In thiah hnatlangah hian Kohhran mite inpekna a fakawm hle a. Kohhran mipuite bakah, Kohhran dang atanga kan Biak In thiah hnatlanga rawn thawkchhuak, mitlawmngai thahnem tak an awm a. Hetianga thanemngai taka hnatlanga chhuak an awm leh Kohhran dangte atanga hnatlang chhuak an awm thin hi a lawmawmin, a ropui tak zet zet a  ni.

Vawi tam tak kan lo lawiluh ve na thin, kan Kohhran Biak In, thiah a nih takah chuan, hmanlai an chang ve ta mai dawn a ni a. Nimin lawka ding luah thin kha, tunah chuan a tak hmuh tur a awm ta lova, thlalak leh suangtuahna mitthlaah lo chuan hmun a chang ta lo. Ava lunglenthlak tehlul em!

Nakin lawkah chuan, thangthar ten suangtuahnain an thlir kir ang a, thawnthu angin a chanchin an la sawi ang a. Chutih hunah chuan keini hi kan la dam a nih pawhin, mittui hnam sawk sawk chungin kan la mitthla let thin ang a. Kan mitthla chuan he kan Biak In thiah tak hunlaiah min hruai kir thin tawh dawn a ni.

He kan Biak In hi, hmun hran hranah awm bosan lawp lawp thin mah ila, ka tan chuan hei aia Biak In nuam leh hlu hi a awm thei bik lova, hei aia ropui pawh hi a awm bik hek lo. Mihring hmasawnnain hmalam a pan zel a, sak that a lo ngai ta tlat si a. Hetia thiah a lo tul ta hi, a lunglenthlak zawnga thlir chuan, mittui a lo hnai nghal vat thin. Ka va han ui tak em!!

Mahse, kha kan Biak In ngei mai, kan ui em em leh kan ngaih em em kha, a nawmna leh a hlutna te, a ropuinate kha, amahah khan a awm lova. A chhunga awm Pathian Thlarauthianghlim leh Kohhran mipuite ah zawk a awm a ni tih ka ngaihtuah thlen chang erawh chuan, ka thaw huai thin.

Kohhran mipuite kan trang tlang ang a, Pathian awmpuinain lungrual takin Biak In thar kan sa zo thuai ang a. Chu Biak In tharah chuan Pathian Thlarau Thianghlim awmpuinain Pathian kan fakho leh dial dial ang a, lungrual takin, hlim takin kan lawiza leh ang a. Tichuan Biak In nuam tak, Kohhran ropui tak chu kan chhawm nung zel ang a. Pathian châka tuihal apiangte thlamuang taka an lawiluh theihna Biak In, Pathian kan hmuh leh pawlna hmun, Biak In nuam tak kan nei leh ngei ang tih ka ring e.

 

Lalbuatsaiha
Dt. 06th June, 2017