Human Trafficking chungchang zirtirna Phullen Kohhranah neih a ni

Ni 15.1.2017 Sunday khan, Presbyterian Phullen Kohhran Naupang Sunday School chawhnu Naupang Inkhawmah NSS Unit, Phullen Higher Secondary School huaihawtin Human Trafficking chungchang inzirtirna Sunday School naupangte pualin huaihawt a ni.

 

He hun hi Pi Lalremliani Programme Officer, NSS Unit, PHSS chuan a kaihruaia, Pathian hnena inhlanna – hunserh chu Nl Lalrochhungin a hmang a. Pu B.Lalhriatpuia, VCP Phullen chu Resource Person niin Human Trafficking chungchang chu naupangte leh kalkhawmte hnenah hrilhfiahin a zirtir a ni.

 
He hunah hian Sunday School naupang thahnem tak an kalkhawm bakah, Village Council members te an tel kim vek a. NSS Unit programme officers te leh NSS Volunteer thahnem tak an tel bawk a. Programme hlawhtling taka hman a ni.

Kan Biak In sak hnatlangah Kohhran dang an lo thawk chhuak thin.

img-20170128-wa0025

Ni 28.1.2017 Kohhran Hnatlang

img-20170126-wa0080

Ni 26.1.2017 Kohhran Hnatlang

 

Kan hriat angin, Presbyterian Phullen Kohhran chuan nikum July 16, 2016 khan, Biak In sakthatna tur Lungphum chu Rev Lalngaihawma, Phullen Pastor Bial vawngtu chuan phumin Biak In thar tur sain theih tawpin hma a la a. Han sawi thui hret ila, Lungphum phum hma atang tawh hian, khatih laia Bialtu Rev HL Thianghlima hovin theih tawpin Biak In thar sa tur hian hma lak a ni tawh nghe nghe a ni.

 

Tun kar tawp lam khan Kohhran Hnatlang kovin Biak In chung sir kual, galary slab chu chhung zo ngei turin thahnemngai takin hma lak a ni a. Tum lawk ang chuan Zirtawp khan zawh hman tum a ni a, mahse zawh hman a ni ta lo va. Vawiin Inrinni hian zawh tumin thahnemngai takin hnatlang koh leh a ni a.

 

He hnatlang kohna hi hriain Phullen Vengthar Kohhran atangin mi engemaw zat Phullen Kohhran Biak In saknaah hian hnatlangin an thawk chhuak a. Hei vang hian, tun kara Biak In sak kalmek a hmachhawp lailawk, vawiina zawh loh an hlauh em em pawh, hma takah an zawh theih phah a ni.

 

Vawiin hnatlang chungchang ka zawhnaah chuan, Phullen Vengthar Kohhran mipuite leh Kohhran dangte hi, vawiinah chauh ni lo, ni dangah pawh an lo hnatlan fo tawh thin thu min hrilh a. Phullen Kohhran pawh hetianga thawkchhuak thinte chungah hian a lawm hle thu min hrilh bawk.

 

Han sawi ta zel ila, nikum lawk khan Salvation Army Phullen Corp chuan Khawmpui lian tham tak a dawng a, Presbyterian Kohhran atangte pawhin hnatlang an chhuak ve thin a ni awm e. Tin, kan khawtlanga Kohhran hrang hrangte hi, khawtlang huap a thiltih lianthamah te leh YMA hmalakna leh thiltihnaahte, khawtlang tan theih tawp an chhuah thin tih hriat a ni a. Kohhran hrang hrangte hian an bungruate pawh Kohhran thilah kher ni lo, khawtlang tan thiltihnaah an hmantir fo thin tih an sawi thin bawk.

 

Hetianga kan khawtlanga Kohhran hrang hrangte, inlungrual taka an awm thu leh, khawtlang tan theihtawp an chhuah thin tih thu hriat hi Phullen khawtlang hmangaihtu tan chuan thu lawmawm tak a ni. Kan khawtlangin hma a sawn zel theih nan inlungrualna leh tanrualna a pawimawh a, chu tur chuan Kohhran hian nasa takin kawngro a su thei tih a chiang a, kan Kohhran te hian, an inlungrualna leh thawhhonate hi chhunzawm zel se a duhawm hle.
Hengte hi a rawng kan bawl Pathian lawmzawng tak pawh a nih ngei ka ring tlat. Kan khawtlang (Phullen) hian hma a sawn chuan, a chhunga awm – Kohhran, Pawl, chhungkua leh mimal tinte hian hma kan sawn ve zel dawn a, khawtlang hmasawnna tel lovin a chhunga awmten hmasawnna tak tak kan nei thei lo. Kohhran lalna khua kan ni a, Kohhran an lungrual a, mipuite pawh inlungrual zel ang u.

Rawngbawl Tura Chhandam – Pu B.Lalhriatpuia

(Phullen Pastor Bial K.T.P Conference vawi 31-na (Dt. 20-22 Jan. 2017 ) Pathianni zan  22.1.2017 a Leader kalchhuak Pu B. Lalhriatpuia Sermon hi he Site a dah atan hian ka dil a, min pe hlauh mai a, a lawmawm hle mai. Chhiartuten kan hlawkpui ngei ka beisei.- Buata)

hriata


RAWNGBAWL TURA CHHANDAM

 

Ephesi 2:8-10
“Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih vang a ni lo ve, chutilo chuan miin an chhuang dah ang e. Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni.”

Galatia 6:9-10
“Tichuan thil tha tih I ning suh ang u; kan inthlahdah loh zawngin a hun takah chuan kan seng dawn si a. Chutichuan remchang hunk an neihzia ang zelin mi zawng zawng chungah thil tha i ti ang u, rinna chhungte zinga mi chungah i ti deuh ber ang u.”

Rom 12:1-2
Chutichuan unaute u, Pathian khawngaihna avang hian, inthawina nung leh thianghlim leh Pathian lawm tlak ni turin in taksa chu inhlanah ka ngen a che u; chu chu in rawngbawlna awm reng a ni. He khawvel dan ang hian awm suh ula; Pathian duhzawng, a tha leh lawmtlak leh, that famkim chu in hriatfiah theih nan, in rilru athara awmin lo danglam zawk tawh rawh u.”


CHHAMDAMNA

Chhandamna camping kan nei a nih loh chuan Kohhranhoah hian Chhandamna chungchang hi kan ngaithla khat khawp mai. Kohhran Upa leh rawngbawltu te hian rawngbawlnaah leh KTP rawngbawlnaah pawh Pathian min chhandamna chungchang hi sawi a khat viau mai. Kan Kohhran member tleirawl/rawlthar chho leh KTP member rawn ni tir, member naupang zawk te hian chhandamna thu leh Pathian min chhandam dan hi an bo viau maithei a ni. Inchhung khurah chhandamna chungchang thu kan inzirtir viau hmel bawk si lo va. Inchhung khurah chuan Josepha, Davida, Mosia etc. chanchin thawnthu sawi hian kan inhrilh tamin a rinawm a, chhandamna chungchang hian sawi hi a hlawh viau lo hian ka hria.

Kan hre vek awm e. Pathianin amah ang takin, a duhdan ang takin, a pawl thin turin mihring min siam a, tichuan Eden huan siam sakin chu huanah chuan a dah ta a. Pathian nen hlim taka an inpawl thin laiin mihringte chuan Pathian siam chhan an lo bawhchhe ta a. Pathian duhloh zawng tiin Pathianin Eden huan ata a paih chhuak ta a.

Amaherawhchu Pathianin a duh taka a siam mihringte chatuana boral tur chu ngai ngam lovin kross lera a fapa thisen hmangin min chhanchhuak leh ta a, chu Pathianin a khawngaihna liau liauva min chhandamna ringa pawm apiang chu chhandam, piangthar, Pa angchhunga mi kan lo ni leh thei ta a ni. Tichuan chhamdam, chhandam kalkhawm, sual ata koh chhuah, koh hran, Pathian Kohhranho kan lo ni ta.


RAWNGBAWL

Chutianga Pathianin a fapa thisen meuh hmanga a chhandamte chuan Pathian lakah bat kan nei ve ta a, chu chu Pathian rawngbawl a ni. Chhandam tura rawngbawl ni lovin, Rawngbawl tura chhandam kan ni. Chhandamna kan chan a kan neih ve theih nan rawng kan bawl lova, chhandamna chang ten Pathian rawng kan bawl zawk tur a ni.

Heng kan rawngbawlna leh kan thiltih hi chhandamna atan a tling zo lo va, chhandamna chu Pathian khawngaihna vang liau liau zawk a ni. Thiltih that leh heng rawngbawlna atana kan thiltih hmanga chhandam nih kan tum chuan kan ti fuh lovang. Kan nih ang angin Pathian khawngaihna avanga chhandamna kan chan hnuah chu khawngaihna avanga chhandamna chang ten Lalpa rawng kan bawl zawk tur a ni.


RAWNGBAWL CHU ENGE NI ?

Rom 12:1-2 kan chhiarah khan kan rawngbawlna tura a sawi chu inthawina nung, thianghlim leh Pathian lawm tlak ni tura taksa inhlan a ni. A nih chuan chutianga taksa kan inhlan dawn chuan enge kan tih ang. Chu kan tih tur chu THIL THA tih hi a ni. Chutichuan THIL THA TIH hi Pathian rawng kan bawlna tur chu a ni.

KTP ten kan thupui innghahna Ephesi 2:10 kan chhiarah khan kan hmu. Thiltha tih hi Pathian min siam dan, kan awm dan tura a lo buatsaih lawk daih tawh a ni. Pathianin Mihring min siam lai khan a pawl theih, a kawm thin tura thil tha ti tur khan min lo ruat lawk dawih tawh a lawm. Mistiri in In a sak dawnin a taka a sak hmain a thinlungah a in sak tur chu a piang daih tawh a lawm. Chutianga a thinlunga a pian phawt lohvin tunge In sa thei ang. Pathianin mihring min siam a tum lai khan kan awm dan tur, kan nih dan tur THIL THA TIH hi Pathian thinlungah khan a piang daih tawh.

Mihringin kan bawhchhiat hnua khawngaihna a chhandam kan nih leh hnu hian Pathian min lo ruat lawk tawh ang ngeiin thil tha tiin Pathian rawng bawl ila Pathian hi a va lawm dawn em !!


ENGTIN NGE THIL THA CHU KAN TIH ANG ?

Isua krista rinna leh Amah anna kawngah thalaite kan hruai ang.
A nihleh Isua Krista chu eng tiangin nge kan rin ang ? Hetiang hian tehkhin thu sawi ta ila Phullen Pastor Bial KTP conference atan Phullen khua leh Phullen Bial a awm a ni tih pawh la hre ngai lo, a kawng a awm tih pawh la hre ngai lo Speaker zuk sawm ta ila, chu Speaker chuan ‘Phullen khua leh Phullen Pastor Bial a awm tak tak ka ring lo ve’ tiin ringhlel ta tlat sela mawl leh a kan ti hle ang. Chutiang ni lovin, Phullen la hmu lo mah sela, Phullen khua leh Phullen Pastor Bial a awm tih pawh lo la hre ngailo mahsela a awm rinhlelhna nei miah lovin kan sawmna a lo aw ta a, kan bial speaker tur chuan nasa takin ringhlel miah lovin a inbuatsaih ta a.

Chutiang rinna, innghah tlatna chu Isua Krista kan rin dan tur chu a ni. Chutiang rinna nung, nget taka rinna chuan kan ring anga, chu kan rinna chu thiltihin kan lantir nghal bawk tur a ni. Jakoba 2:14 thla kan chhiar chuan thiltih pawimawhzia kan hmu. Thiltih tello rinna chu thi a ni a ti tawp mai. Isua Krista nghet takin kan ring anga, chu kan rinna chu kan thiltihah a lang zar zar bawk tur a ni. Isua Krista mizia leh a mah anna chu kan hria. Chumi rinna leh A mah anna kawngah chuan thalaite kan buatsaihin kan hruai tur a ni.


Kohhran kutke ni turin thalaite kan buatsaih ang.

Kohhranin kut atan a hman theih, ke atan a hman theih kan ni anga, chutiang tur chuan thalaite kan buatsaih ang. Ke na chuan a chaklohna chhawmdawl turin tiang a mamawh thin. Chutiang chuan Kohhran tan tiangah kan tang tur a ni. Chutiang ni tur chuan thalai rilru leh taksa chak tak tak te Pathian Kohhranho tan kan buatsaih tur a ni.


Kohhran hnathawh kan tipuitling ang.

Kohhran hnathawh chu kan hria. Kohhran din tirh atangin a hna thawh chu chanchintha hril leh Pathian Beramhote, Kohhran mipui enkawl a ni. Kohhran hnathawh tinung zawng leh chhawmnung zawngin, Kohhran duhloh zawng ti lo tur leh a hnual suat zawnga khawsa lo turin leh Kohhran Upa leh Pastor te kaihza tha venga chhawmdawl turin thalaite kan buatsaih ang.


Krista chanchintha kan puang darh ang.

Chanchintha puandarhna atan leh KTP kan rawngbawlna atan kan ngulpui ber chu Rinna thutiam, (Faith promise) hi a ni. Kan rinna thutiam hi tam takin a awmzia kan man vak lo niin a lang. Kumtluana kan intiamna kum tira han tlak thin te hian rinna thutiam awmzia kan man lo va, a nih ang turin kan kalpui pha lo. A nihna ang tak hian kalpui ila chuan he rinna thutiam hi a ropui lutuk. He rinna thutiam hmang hian Pathian kan pawl tur a ni. Kan neih tur chiangsa atanga tiam lovin Pathianin min pe anga ka nei thei ngei ang tih rinna nung atanga tiam tur a ni. Chumi hmang chuan Pathian karin, Pathian dilin, Pathian kan pawl thin tur zawk a ni. Sum leh pai kan pek taka chu a tha em em a, chu aia pawimawh zawk chu, chumi hmanga Pathian kan pawlna leh kan hriatna, Pathian pawhin min hriatna chu a ni.

Kohhran mipui, Kohhran nu leh pa te pawhin chutiang chuan kan Pathianram sawma pakhat kan pek dan tur chu a ni. Pathianin mi phut, kan nih dan tura a duh leh kan awmdan tura a duh tha tak leh thuawih taka kan zawm chuan Malakia-ah eiraltu min khap sak min tiam alawm. Heng eiraltu hi Pathianin min khap sak lohvin tunge khap thei ? Kan buh leh bal a seng hun tawha chhem tlu vek thei thli tunge khapa titawp thei ? Sazu leh Sanghal tunge thunun thei ? Kan sum leh pai zawng zawng kan khawhralna tur kan taksa natna chungah tunge thunei ? Natna khirh tuarlo turin ka taksa ka thunun thei em ni ? Heng zawng zawng hi Pathianin min phut thuawih taka kan tih leh a thu kan zawm chuan min khap sak a tiam alawm. “Van tukverh te hawn sak che uin malsawmna dawn sen loh khawp hial ka vur dawn che u nge dawn lo ? min han fiah teh u” a ti a lawm. Chuvangin heng zawng zawng hre reng chungin huaisen takin kan neih sum leh pai hmangin Krista chanchintha thahnemngai takin kan hril tur a ni.

Tin, sum leh pai hmang kherlo, mahni ram hranah kan kal chhuak thei kherlo a nih pawhin kan thenawm, kan thiante, kan chhungte, mi mithmuhah kan nunin kan lantirin kan hril tur a ni. Kan nunah miten Isua hmel hmuin Isua Krista zui ve chaka siam turin kan nun, kan awmdan kan buatsaih tur a ni.


A TAWP KHARNA

Zirtirtuin a zirtir tur a passed phawt loh chuan a zirtir thei ngai em ni ? Kristian Thalai te hian heng zawng zawng hi kan zir a kan pass loh chuan kan thalai puite kan hruai thei dawn em ni ?

Rawngbawl tura chhandam thalaite rawngbawl ning, phurrita ngai, hahthlak ti, ti tha peih lo, thiante nawr kal reng ngai kan awm em ? Chutiang kan awm a nih chuan Pathian chhandamnaah leh piantharnaah kan la chiang tawklo a ni mai lo maw ? Tih tak takah chuan Pathian rawngbawl hi khawvel thil tak pawha mawi pui, that pui, changkan pui, hmelthat pui, luck pui kan tam mai. Thiam taka Kohhran zaipawl, Bial zaipawl, BSI zaipawl a ka zai lai hi ka dam chhunga ka mawi lai ber a ni mai lo maw !! Hmeichhia te phei chu in nulat a pelh chuan in chhangchhia a, in chhangchhiat a reh chuan in tar leh tawh si anga, hetianga rawng kan bawl lai hi kan dam chhunga kan mawi lai ber zawk a lo ni.

Kan rawngbawlna chanvo pawh Pathianin min pek hunlai a nei. Min pe reng lo. Min pek laia, kan chanvo a nih laia kan tih that duh loh chuan kan la inchhir ang. Pathianin he khawngaih rawngbawlna hna kan chanvo a a dah lai hian kan thiamna leh finna zawng zawng nen thahnemngai takin Pathian rawng I bawl ang u.

Rawngbawl tura chhandam Kristian thalaite kan awmna tura Pathianin min lo buatsaih lawk tawhna hmunah min buatsaihtu min buatsaih ang ngeiin min buatsaihna hmunah ngei hian thahnemngai tak leh lawm chungin THIL THA TIIN Pathian rawng I bawl tlat ang u.

Lalpa`n malsawm rawh se.

Upa Laprema 2016 Krismas

Kumthar lawmawm kan thleng leh ta..

By: Rev. Lalngaihawma, Phullen Pastor Bial

rev-lalngaihawma-pln

“Hun leh tuilianin tumah a nghak lo” an lo ti mathlawn lovin hun leh nite an liam zel a. “Rinna thlain va lengin, Bethlehem chuan ila, Va fang ila Lal Isua kan tan a pianna hmun;…..” kan tih hunte chu kohkir rual lohvin kumhlui chuan a herliampui ta !! Kumthar lawmawm kan thleng leh ta, min hruaitu Lalpa chu fakin awm rawh se. Mihringten hunbi kan chhiarna kumpui rawn inher chhuak hian rilru leh ngaihtuahna a khawih a. Lunglenna leh khawharnain min rawn umzui nghal thuai \hin.

Chutih mek laiin kumthar rawn inher chhuak hian loh theih lohvin hmalam min thlirtir a. Eng nge he kumthar hian a rawn herchhuahpui dawn ? tih chu zawhna lian tak, mitinte rilru kaptu a ni leh ta ! Hetiang hunah hian kumthar thuchahte pawh an lo sawi fo \hin. Pathian thuin engtinnge kumthar thuchah a sawi i lo thlirho dawn teh ang.

Kumthar thuchah ropui chu ….
Bible-a kumthar thuchah ropui tak kan hmuh pakhat chu hruaitu ropui Mosia sawi a ni. Israel faten Aigupta ram an chhuahsan hnuah kum 40 dawn lai thlalerah an kal a, ramtiam Kannan ram an lut dawn ta a. Chutihlai chuan kumthar a lo ni dawn a, Mosia chuan an hnenah kumthar thuchah ropui tak a sawi ta a(Deut 11 : 12).

A hmasa berah chuan an va luah tur ram chu Lalpa zawn chhuah ram a nih thu leh, chu ram chu Pathian pek a nih thu a sawi a. Chu rama hruailuttu chu Lalpa a ni. Thlalerah mi tam tak an boral tawh a, anni erawh chu a khawngaihna vanga zuah an ni a. Chuvangin Lalpa chu an hrereng tur a ni.

Hetiang chiah hian kumhlui ata kumthara min hruailuttu chu Lalpa a ni. Kumhlui kan hman ral takah khan mi tam takten chatuan ram min pansan a, keini erawh chu a khawngaihna avangin kumthar min hruai thleng a. Chu chu kan fel leh \hat bik vang a ni lo; Lalpa zahngaihna vang liau liau a ni. Chuvangin he kumthar min hruai thlengtu theihnghilh lova, a duhzawng tih nana hman hi kan tihmakmawh a ni.

A dawt lehah chuan chu Kanaan ram chu ramsa hlauhawm pui pui leh mi kawlhsen tak takte awmna hmun a ni a. Pathian chakna rinchhan lo chuan an ding zo dawn lo a ni.

Keini pawh he kumthar hian eng nge min rawn thlen dawn kan hre hauh lo. Kan hmaah hian harsatna nasa takin min hmuak pawh a ni thei e. Pathian chakna rinchhan lo chuan kan ding zo lovang. Chuvangin Pathian kan belh tlat a \ul takzet a ni. Amah rinchhan tlatin he kumthar hi i hmachhawn mawlh teh ang u.

A tawpberah chuan Mosia chuan chu ramtiamah chuan Pathian mit chu Israelte chunga a fuk reng tur thu a sawi a. He kumtharah pawh hian Pathian engkimtithei, engkim hria, khawikipa awm chuan min thlir reng dawn a, A thu lovin engmah a thleng lovang tih hi ring ila. A mite chu buaina leh harsatna karah pawh vengin a awmpui zel dawn a ni. Chuvang tak chuan a duhzawnga nung a, Amah hriatreng a \ul tak meuh a ni.

Tanlak thar hun a ni e…

Grace Noll Crowell-i chuan, “Lalpa, he kumtharah hian ka kiangah kal la, i kutin min chelh reng ang che” a lo ti a. Chutiang bawkin hnam fing zawkte chuan kumthar Pathian duhzawnga an hman theih nan kumthar thutiam (New Year’s Resolution) an lo siam \hin. A \ha thei ang bera Pathian duhzawnga hmang turin an intiam \hin.

Pathian thuhriltu ropui Jonathan Edwards-a (1703-1758) pawh khan rawlhar a nih laiin, “He kumtharah hian Pathian thu ang zelin ka nung a, a theih anga hmasawn ka tum ang a, inchhirna tur engmah ka ti lovang ang a, phuba ka la ngai hek lovang a, thil \ha lo engmah ka ti lovang” tiin Pathian hnenah a lo intiam \hin.

Keini pawh he kumthar hian eng nge a rawn herchhuahpui dawn kan hre lo. Chuvangin Pathian hnenah inhlanthar ila, nasa lehzualin a hman atan i inpe ang u.

Fak hla siamtu chuan,
“Kum ralta hrereng lovin,
I thu thua awm turin min pui la” a lo ti a. Keini pawhin, “Kan damchhung nite chhiar dan tur min zirtir ang che” ti chung zelin he kumthar hi i hmang mawlh ang u.

Upa Lalrema a inkhawm

Ni 26.12.2016 Monday chhun inkhawmah Upa Lalrema chu chak lo tak tawh chungin a inkhawm ve. Upa Rema hi a faten Biak Inah hian an rawn hruai a. Kohhran hotute (a Upa puite) chuan duhsak leh duat taka lo dawngsawngin, sawitawm hun pawh Sawitantu dawtah an sawi tir a ni.

Krismas 2016

Kum 2016 Krismas chu hlim taka hman a ni a. Ni 25.12.2016 chu Biak Inah inkhawm a hun hman a ni a. Inkhawm banah Thingpui leh Chhang ruai kilho a ni. Chhang hi Mizo chhangban chhum ngei hman a ni. A tui hle.

Ni 26.12.2016 leh Ni 27.12.2016 ah Inkhawm a hun hman a nih hnuah tlai lamah Krismas ruai tui tak Kohhran mipuiten kan kilho.

Zan lamah Kohhran lengkhawm a awm thin a, zai a nuamin Hall ah an lenglo nasa hle a. Kohhran mipuiten hlim takin he hun hi kan lawm a ni.